South Carolina bar lun taka inpawng kahnaah mi pali thi

South Carolina bar lun taka inpawng kahnaah mi pali thi
US chhim lama South Carolina-ah zu inna hmun (bar) lun taka inpawng kahna thlengah mi pali an thi a, mi dang 20 velin hliam an tuar bawk tih thuneituten an sawi.
St Helena Island-a bar lar taka Pathianni zing hma taka inkahna a thlen lai hian mi 100 chuang an awm a, thi leh hliam pawh an tam phah a. Thil thleng hmutu tam tak chu an himna tur dapin a bul hnaia sumdawnna hmun dangah an tlanchhia tih an sawi niin Beaufort County Sheriff pisa chuan a puang.
Bar-ah hian mi pali an thi tih puan a ni a, mi 20 velin hliam an tuar a, heng zinga pali hi an dinhmun a tha vak lo va, tual chhung damdawi inah enkawl mek an ni tih sheriff pisa chuan a sawi.
He thil thleng hi chhui zui mek a ni a, sheriff pisa hian tu nge a titu ni ang tih an zawng zui mek bawk tih an sawi.
Police leh a hre hmasate an thlen hian silaia kah hlim mi eng emaw zat an hmu tih sheriff pisain thuchhuah an siamah tar lan a ni.
Silai hmet puaktu hian tum bik a nei nge a remchang apiang a kap tih pawh hriat theih a la ni lo va, sheriff pisa thupuangtu chuan engmah chiang hriat an la nei lo tih a sawi.
Inkahna thlenna bar hi Willie’s Bar & Grill niin Gullah nena inzawm ei tur leh in tur an kawl a, an website-a an tar lan dan chuan ‘Gullah Geechee culture chu miin lawm taka an pawm theih nana thehdarh’ an tum a. Gullah Geechee hi African thlah kal zel, US chhimchhak lam tuipui kam hrul, South Carolina thlengin, lova thawk thin sal an sawina a ni.
South Carolina Republican Representative Nancy Mace-i chuan, “Beaufort County-a inkahna rawng tak a thleng tih han hriat hian MIN TILUNGCHHE TAK ZET,” tiin X-ah a tar lang a. “A tuartu, an chhungte leh he tharum thawhna rawng takin a khawih pawi ve dang zawng zawngte kan tawngtainaah kan hre reng a ni,” a ti bawk.
Willie’s hian an bar-a thil thleng chungchangah hian engmah sawi an la nei rih lo.