World Cup khel tura tling thar Ivory Coast, Senegal leh South Africa

World Cup khel tura tling thar
Ivory Coast, Senegal leh South Africa
Thawhlehni CAF World Cup Qualifiers-a an tumpui theuh hnehin Ivory Coast, Senegal leh South Africa-te’n 2026 Fifa World Cup kel turin an dinhmun an sawhnghet ve leh ta.
Ivory Coast hian Group F-a an tumpui Kenya lakah 3-0 hnehna changin, an khawpui lian ber Abidjan khaw inkhela an goal hmahruai hi a tir lama Franck Kessie tihluh a ni a; second half-ah rawlthar Yan Diomande chuan sihnih faia mualneitu team hmahruaina a thawh a; Manchester United player Amad chuan free-kick chhuih kual ngawkin sithum faia Elephants chakna goal a thawh ve leh.
Ti hian, Africa khawmualpui champion Ivory Coast hian point khatin an group-ah hma an hruai fal ta a; inkhel danga sihnih faia Burundi hnehtu Gaban hmakhalh hlenin, kum 2014 hnu lama a vawi khatna atan Fifa World Cup-ah Ivory Coast kan hmuh leh thei dawn ta a ni.
Ivorian-ho hian 10-game group campaign-ah goal an chhuah miah lo a, an khawmualpui atang chuti ang ti thei ram pahnih zinga pakhat zawk niin, goal chhuah lo dang chu Tunisia an ni.
Senegal pawhin Thawhlehni inkhel sangha 4-0 ngawtin Mauritania an sdawp a, Group B hmahruaitu ni chungin an dinhmun an sawhnghet.
Hliam avanga Qatar ram 2022 World Cup khel ve thei ta lo Sadio Mane free-kick hmangin Senegal hian half-time dawnah an goal hmahruai thunin, a hnuah Liverpool forward hlui hian goal khat dang a tilut ui leh a; mualneitu team goal hnih dang hi hun tawp hnaih lama Iliman Ndiaye leh Habib Diallo-te tihluh a ni thung.
Qualifying campaign an zawh hnuah Teranga Lions hi point hnihin an hnuai chiaha tling zo ve ta lo DR Congo chungah an awm a; Thawhlehni vek khan Congo hian first half-a Theo Bongonda goal khat thun hmangin Sudan lakah 1-0 hnehna chang bawk mah se Senegal an hmakhalh zo ta chuang lo a ni.
CAF World Cup Qualifiers Group C inkhelah 3-0-a Rwanda hnehtu South Africa pawh kum 2010 tournament an thlen hnua a vawi khatna atan Fifa World Cup khel turin an tling ve ta bawk.
Mbombela Stadium-a Bafana Bafana chakan goal thum hi Thalente Mbatha, Oswin Appollis leh Evidence Makgopa-te thawhkhawm niin, an qualifying group-ah Nigeria leh Benin an hmakhalh thei ta hram a ni.
South Africa hi tunha lamin World Cup vawi thumah an inlan ve tawh a, kum 1998, 2002 leh 2010 kan group stage paltlang zo lo zawngin an tawp fai vek a ni.
Canada, Mexico leh United States inthlentawm tur 48-team World Cup-a inlan turin Africa khawmualpui atangin Ivory Coast, Senegal, Morocco, Tunisia, Egypt, Algeria, Ghana, Cape Verde leh South Africa-te’n ticket an hum fel ta a; thla thar hian team, khat dangin tling tawhte hi an belh ve leh thei dawn a, continental play-offs kaltlangin group stage khelh zawh taka pahnihna team zinga point hmu sang zual ram pali – Cameroon, DR Congo, Gabon leh Nigeria-te’n nakkum World Cup khel tur Africa ram 10-na nih an inchuh ve leh dawn a ni.
Confederation of African Football chuan play-off draw hun hi an la puang lo.