All India Police Meet-ah taekwondo gold 2
Srinagar, Jammu & Kashmir-a khelh mek 10th All India Police Judo Cluster 2025-ah Mizoram Police aiawha khelte’n taekwondo gold medal pahnih an hlawhchhuak.
Gold medal latu hi Lalruatkima niin, Taekwondo Poomsae Individual inelnaa a lak a ni a, semi-final a paltlang hnuah final atana mi pariat thlitfim zingah a tel a; final-ah point hmu sang berin a champion.
Lalruatkima hian nikum khan Vietnam rama Asian Police Taekwondo Championship-ah India tan gold medal a lo la tawh bawk.
Tuntum All India Police Judo Cluster 2025-a Mizoram Police gold medal dang hi Lalruatkima, C. Vanlalhuma leh PC VL Remtluangate tanghoin Group Poomsae-a an lak a ni thung.
India rama Police infiamna sang berah silver leh bronze lo la tawh thin mah se taekwondo inelna huangah chuan gold medal an lak tum khatna a ni a, Mizoram Police pawh an lawm hle a ni.
SAI leh All India Police Sports Control Board (AIPSCB)-te tangkawpin an buatsaih All India Police Meet vawi 10-naah hian state 25 atangin Indian Police Force hrang hrang 37 an tel a, infiammi 2000 chuang an chhuak.
Inelna chi hrang hrang panga – Taekwondo, Wushu, Judo, Penchak Silat leh Karate awmin, Mizoram atangin player pasarihte’n an khel a ni.
Gold medalist-te:
Male Individual Poomsae
Lalruatkima, 1st MAP
(attached to security)
Male Group Poomsae
Lalruatkima, 1st MAP
(attached to security)
C. Vanlalhuma, Aizawl DEF
PC VL Remtluanga, 1st MAP
(Attached to security)