India rama damdawi in thaah Mizoram PHC 3 lan belh leh

India rama damdawi in thaah
Mizoram PHC 3 lan belh leh
India rama sawrkar damdawi in tha bik tehnaah Mizoram primary health centre pathum – North Vanlaiphai PHC, Rabung PHC leh Farkawn PHC an tling thar leh a, heti hian Mizorama Health & Wellness Centre/ PHC 57 target awm zinga 39-in NQAS national certificate an nei tawh.
National Health Mission Mizoram mission director Dr Lily Chhakchhuak sawi danin, India rama sawrkar damdawi in tha bik tehna, National Quality Assurance Standards (NQAS) a tling thar North Vanlaiphai PHC hian 92.63% hmu in, Rabung PHC-in 86.68%, Farkawn PHC 80.78% an hmu.
Heti hian Mizorama sawrkar damdawi in 52 chu NQAS national certificate nei tawh an ni a. Tunah hian sawrkar damdawi in 15 leh HWC Sub-Centre 21-in state level certificate nei tawhin national-level assessment an dil mek.
NHM mission director chuan India rama sawrkar damdawi in tha tehnaa tling thei tura thawktu State Quality Assurance Unit, SNO leh staffs Champhai, Khawzawl leh Serchhip District CMO leh staff zawng zawng, heng PHC-a medical officer-te leh thawktu dangte thawhrimna fakawm a tih thu a sawi a ni.