Thawmhnaw siamtuten Dhaka tumhmun kang tuar na

Thawmhnaw siamtuten Dhaka tumhmun kang tuar na
Dhaka thlawhna tumhmuna bungraw lak luhna bik dahna hmun nasa taka kangin thawmhnaw thawn chhuaktute bungrua leh hmanraw tam tak a tichhia a, thil hloh pawh a tam a, dollar maktaduai tel chânin an tuar dawn hle tih industry hruaituten an sawi.
Inrinni chawhnua thlawhna tumhmuna bungraw lak luh dah khawmna bik nasa taka kang hian thlawhna dang thlawk pawh a tibuai a. A khu pawh Pathianni thleng khan la zamin kang thelhtu leh tumhmun thuneituten thil chhiate an thlithlai mek.
Kangmei chhuak hian thil siamna atana bungraw lak luh dahna hmun bik a tichhia a, thawn chhuah mai theih tura peih tawh thawmhnaw leh an thil siam sample te pawh a kang chhia a. Hengte hi $ tluklehdingawn 47 zeta hlu, Bangladesh-a thawmhnaw siamtu industry tana thil pawimawh leh hlu tak tak a ni.
“He thil thleng hian kan ram atanga thil thawn chhuah a tibuai tak zet dawn a, a bikin thawmhnaw lamin a tuar zual dawn,” tiin Bangladesh Garment Manufacturers & Exporters Association (BGMEA) Vice President Inamul Haq Khan-a’n Pathianni khan a sawi.
“Bungraw hlu tak tak leh hmanhmawh taka thawn chhuah turte a chhia a. Heng zingah hian thawn chhuah tura buatsaih thawmhnaw, a siam chuahna tur hmanrua leh a pawimawh ber, kan thil siam sample-te pawh a tel a ni,” a ti.
An thil hloh hi a tam em avangin an sumdawnna kal zelnaah pawh nghawng a nei thei tih a sawi a. “Heng sample-te hi min dawr thar tur leh min rawn chah duhtu tur huang kan zauhna atana pawimawh a ni a. Kan hloh vek avangin kan member tam takin hun remchang an neih an chân tihna a ni,” a ti.
BGMEA hian thil thawn chhuaktute atangin eng ang chiah nge an inhloh tih an chhut mek a. “Member-te chu an bungraw chhiate kimchang taka min hrilh turin kan ti a, online portal-te pawh data lakhawm chak turin kan ti,” tiin Khan-a chuan a sawi.
Dhaka-a airport cargo village hi Bangladesh-a bungraw thawn tur thlenna leh ram dang atanga thleng dahna lun ber a ni a, ni tin bungrua metric ton 600 chuang an buaipui a, October leh December-ah hemi let hi an buaipui thin bawk.
“Ni tin gactory 200 atanga 250 velin thlawhnain an bungrua an thawn thin a. A sum zawnga mi nghawng a nat dan tur chu chu chuan a tichiang hle a ni,” a ti.
Kangmei chhuah chhan hi hriat a la ni lo va, chhui mek zel a la ni.
Tun hi chawlhkar khat chhunga Bangladesh a chhuah lian tham pathumna a ni a. Thawhlehni kal ta khan Dhaka-a thawmhnaw siamna leh a bula bawlhlo dah khawmna in kangin mi 16 vel an thi a. Ningani khan in chhawng sariha sang thawmhna siamna tho Chittagong-ah a kang bawk.
Bangladesh hi China dawta khawvela thawmhnaw thawn chhuak tam ber an ni a. Khawvel huapa lar tak tak – Walmart, H&M leh Gap thawmhnaw hi an siam niin thawktu maktaduai li chuang an awm a, kum tin $ tluklehdingawn 40 thawk chhuak ang an ni.
Tun tum kangmei chhuak hi thawmhnaw thawn a tam zual lai intan dawn, mamawh an tam lai a ni a, hei hi an tawrh a nat zual phah dawn a ni.