Real-in hma an hruaikir leh

Real-in hma an hruaikir leh
Inrinniah hnehna changin reigning champion Barcelona-in Spanish La Liga table-ah hma an hruai a, Pathianniah Kylian Mbappe goal khat thun hmanga sikhat faia mualneitu Getafe hnehin Real Madrid-in an hmahruaina an neikir leh.
France captain Mbappe hian season kal laiah La Liga goal 10 tilut tling tawhin, goalscoring chart-ah hmahruaitu a ni nghal bawk.
Coliseum stadium-a mipui 10,090 pungkhawm hmaah Spanish giants hian chawlhlawk hmain goal an thun zo lo a; second half-ah pawh chuti tho chu a ni leh a; minute 77-ah khelmuala second 44 chauh a tal hman tihin Getafe substitute Allan Nyom chu tharum thawh vangin hnawhchhuah a ni a; Watford leh West Brom full-back Nyom red card hmuh chhan hi a kiu hmanga Vinicius Jr. a nghawk vang a ni.
A tam zawk an nih atanga minute thum an khelh tlin rualin Mbappe chuan Guler-a pass atangin Getafe keeper David Soria dan zawh loh goal a khung a, mikhual chakna goal a ni nghal.
Home team buaina belhchhah turin minute 84-ah striker Alex Sancris chu yellow card vawi hnih hmuh vangin hnawhchhuah a ni leh.
Player pahniha an tlem zawk hnuah Getafe hian an siphurh sut turin hun remchang zet an hmu a, hun pekbelh minute rukna a kal mek laiin Real keeper Thibaut Courtois chuan Hull City loanee Abu Kamara goal tur a dansak thei hram a ni.
He inkhelah hian team pahnihin Spanish league laka lawmlohna an lantir a; United States khawpui pakhat Miami khelmual Hard Rock Stadium-a kumin December ni 20-a La Liga game khat Villarreal vs Barcelona nghah a ni tur chu duh loin tan atanga second 15 chhung chu team pahnih player an chesawn duh lo!
Real tan draw ringawt pawh Barcelona hmahruaina chhuhsak turin a tawk a; Catalan team-in Inrinnia 2-1-a Girona an hneh hnuah an hmahruaina hloh mah se Bernabeu club-in an mikhualna khelmual atanga point thum thawkchhuak chungin hma an hruaikir leh ta a ni.
Naktuk, Nilaini hian Champions League lamah Real hian Juventus an hmachhawn zui leh ang.