Veteran actor Asrani a thi

Veteran actor Asrani a thi
Indian hranghlui actor Asrani, kum 84, chu natna hrang hrang avanga hun eng emaw chen an enkawl hnuah Thawhtanni tlailam khan Arogya Nidhi Hospital, Jihu-ah a thi tih an puang a, Prime Minister Narendra Modi leh Union Home Minister Amit Shah te pawhin Asrani an ui thu an puang. Asrani hi Indian film zinga ngaihhlut hlawh ber pawl Sholay star a ni.
Asrani manager Thiba chuan kar hnih zen zawn chu Asrani hi a nuamsam lo tawh niin a sawi a, “A nawmsam loh avang leh thawk lamah harsatna a neih avangin Arogya Hospital-ah admit a ni,” a ti a, a chuap-ah tui a tling niin a sawi bawk. Thiba chuan, “Vawiin tlai (Thawhtanni) dar 3 vel khan a kal ta a ni. A puala hun hnuhnung pawh Santacruz crematorium-ah hman a ni a, a chhungte leh thian hnaite an tel,” a ti bawk.
Asrani hi Indian cinema-ah kum 50 chuang inhmangin, flim hrang hrang 300 chuangah a chang hman a, ‘Sholay’ film-a jailer anga a channa chu a larpui hle a, ‘Bhool Bhulaiyaa,’ ‘Dhamaal,’ ‘Welcome,’ ‘Bunty Aur Babli 2’ te pawh a film channa tam tak zinga hriathlawh tak tak te an ni.
Asrani hi January ni 1, 1941 khan Jaipur-ah a piang a, 1960-1962 chhungin Sahitya Kalbhai Thakkar hnuaiah acting a zir a, a hnuah Mumbai-ah professional acting a lut turin a kal ta a ni. Tihpalh thil thuin film siamtu Kishore Sahu leh Hrishkesh Mukherjee te nen intawngin, anni hian lemchan lamah a kal tak tak theih nan kawng an sial sak ta a ni.