Lirthei hmanga eizawngte mangang
Kawng chhiain kawng hrang hrangin Mizoram a nghawng mek a, lirthei hmanga eizawngte phei chu an mangang hle. An sum thawhchhuah a tlahniam a, chhungkua a nghawng mek tih an sawi.
“Kawng chhia hian keini, truck neitute min nghawng nasa a, sum thawhchhuah a tlem phah a, kan mangang a, loan rulhna tur tlan chhuak zo lo hi an awm teuh,” Mizoram Truck Owners Association hruaitute chuan an ti.
“Chhungkaw sum lakluh a tlem a, kawng chhiaah kan tlan avang hian motor siam a ngai reng a, kawng lakah kan thang rei bawk avangin kan tlan tlem sawt a. Chu chu a hautak em em mai a ni,” an hruaitu pakhat chuan a ti.
Mizoram Truck Drivers Association hruaitu pakhat pawhin kawng chhiain chhungkaw khawsak a nghawng thu hi a sawi a, “Motor a chhe nasa a, hei hi kawng chhiaa kan tlan vang a ni a. A ke kan tlan puak nasa a, motor ke hi pakhat pawh Rs 23000 man te a ni a, a part dang thlak a lo ngai reng bawk a. A siam turin mechanic kan koh a ngai fo a, motor hire a ngai a, kan inseng hnem,” tiin a sawi.
“Tlan loh a hlawk zawk kan ti mai a. Loan rulh ngai lo tan chuan tlan loh hi a hlawk zawk tak tak ang. Mahse loan rulh ngaite tan chuan tlem tal thawhchhuah a ngai a, loan rulhna tur a daih lo a nih pawhin tlem azawng tal sum a lo luh khan a zangkhai ve a. Chutiang chu kan dinhmun chu a ni,” a ti bawk.
Truck neitute leh a khalhtute chuan phai atanga bungraw phurh aiin Aizawl atanga khaw danga bungraw phurh a hlawk zawk tih an sawi a, a bikin Lunglei leh Champhaiahtea bungraw dah a ziaawm tih an sawi.
Vairengte leh Aizawl inkar kawng a chhe telh telh a, lirthei khalhtute Nilaini zanah pawh Kawnpui dai velah lirthei tang an intlar thui tih an sawi.
Kolasib lamah Mizoram Tipper Association, District Headquarters leh Joint Action Committee te’n kawng chhia vanga lungawi lovin ni 23 khan kawng an dang a, mahse police-in an rut. Ni 24 hian Mizoram Truck Owners Association leh Mizoram Truck Drivers Association te’n kawng hi a huhova en an tum a, NHIDCL hotute nena inbiak tum ni lovin an hnathawh dan te en tum an nih thu leh, lungawi lo taka thawhchhuah an tum thu te an sawi.