CM leh a adviser-in MCC bawhchhia – MNF Legal Board

CM leh a adviser-in MCC bawhchhia
– MNF Legal Board
Dampa bial by election neih tura campaign-naah chief minister Lalduhoma leh adviser to chief minister Dr Lorrain Lalpekliana Chinzah, MLA te chuan model code of conduct an bawhchhia tih MNF chuan sawiin, election hotute hnenah complaint an thehlut.
MNF Legal Board-in joint chief electoral officer Ethel Rothangpuii hnena Zirtawpnia ziaka complaint an thehluhah, Dampa biala by election neih turah model code of conduct (MCC) hman mek a nih laiin, chief minister leh adviser to CM hian MCC-in tih loh tur a sawite pawisa loin an party candidate tan vote hmuh sak theihna tur ang hawi zawngin an campaign tih an sawi.
Chief minister hian October 20 khan Reiekah an party, ZPM tana Dampa East Block campaign a khuhhawnnaah, Reiek mipui hnenah an thlai thar sawngbawlna kawnga hmasawnna itawm tak tura anga ngaih theih ruahmanna tharlam thawh sak an nih tur thu leh, hmasawnna tam tak bial mipuiin an dawng dawn tih a sawi thu sawichhawngin, a thusawi hi video clip a awm tih an sawi a ni.
October 21-a New West Phailenga Dampa West Block campaign khuhhawnnaah chief minister hian, tui chungchangah cheng vaibelchhe 770 man Reiek hmunah tuikhuah siamin, a chhehvel khaw 14 chawm tel thei tur a nih dawn thu, fur laia Tlawng tui pump a theih loh laia Aizawl chawmtu tur a nih nghal tur thu a sawi, tiin, “Hetianga mipui hnena a sawi hi MCC bawhchhiatna a ni,” an ti.
MLA Dr Lorrain Lalpekliana Chinzah hian October 17 khan Dampa constituency chhung khaw thenkhat – Parvatui leh Phulpui West ah ‘free health clinic’ buatsaihin a thlawnin damdawi a sem thu leh mipuiin an hluta an chhawr tangkai thu chu, amah tawiawmtute hming nen Facebook-ah post a siam tih an sawi a.
“Hetianga MLA ni lai leh adviser to CM hmalakn dan pawh hi an party leh party candidate chu miin an vote theihna atan voter-te hneh tumna campaign-na kawng khat a ni tih a chiang a ni,” an ti.
MCC an bawhchhiat na tarlangin, Chapter II (i) sum leh pai hmanga voter-te thlem; Chapter VIII (3) minister, MP, MLA, CEM, councillors thuneitu dang leh political mi leh sa reng rengin sum hmanga tanpuina emaw hmasawnna lam thil an pechhuak tur a ni lo; chapter VIII (13) ruahmanna tharlam hawi reng reng puan chhuah rih loh tur, tihte a ni tih an thlen.
‘Democracy rama kan tum ber pakhat, inthlan felfai leh thianghlim tak neih, chumi a thlen theihna tura rim taka hma lak a nih lai a, ram hruaitu lu ber leh a adviser-in nakin zel atana chhunzawm tlak loh tur dan bawhchhiatna min hnutchhiah a, MCC pawisa miah loa an chet dan hi a tha lo takzet a, an chungah dan anga hremna pe turin ka ngen che a ni,’ tiin joint CEO hian thlen a ni.