Gandhi chhungkaw hovin Congress-in campaign beihpui thlak dawn

Gandhi chhungkaw hovin Congress-in campaign beihpui thlak dawn
Congress President Mallikarjun Kharge bakah an hruaitu hlun – Sonia Gandhi, Rahul Gandhi, Priyanka Gandhi Vadra, Kanhaiya Kumar leh Independent MP Pappu Yadav te chu Bihar assembly inthlan tur thawh khatnaa an party star campaigner 40 ruat chhuah zingah an tel.
AICC Bihar in-charge Krishna Allavaru, Bihar Congress chief Rajesh Ram, Congress general secretary – K C Venugopal, Bhupesh Baghel, Sachin Pilot, Randeep Surjewala leh Syed Naseer Hussain bakah hruaitu hlun dang – Ashok Gehlot, Tariq Anwar, Gaurav Gogoi, Mohammad Jawed leh Akhilesh Prasad Singh, te an tel bawk.
Bihar inthlan thawh khatna hi November 6-ah neih tur niin November 11-ah thawh hnihna neih a ni ang a, November 14-ah vote chhiar a ni ang.
Eptu tangrual, INDIA-ah Congress hi RJD, leh Left party-te nen awm hovin Ningani khan RJD hruaitu, Tejashwi Yadav-a chu chief minister atana zawrh chhuah turin an puang tawh.
Himachal Pradesh Chief Minister Sukhvinder Singh Sukhu, hruaitu hlun – Digvijaya Singh, Adhir Ranjan Choudhary, Meira Kumar, Charanjit Singh Channi, Alka Lamba, Pawan Khera, Imran Pratapgarhi, Shakeel Ahmed, Ranjeet Ranjan, Rajesh Ranjan alias Pappu Yadav, Anil Jaihind leh Rajendra Pal Gautam te pawh star campaigner an ni dawn bawk.
Bihar inthlan hun hi a hnaih tawh avangin a boruak a sang tawh hle a. Tu nge chak ang tih inrinsiakna piah lama tun laia titi lar tak chu Gandhi-a inlan lo rei tawh lutuk chu a ni.
Gandhi-a’n Bihar a tlawh hnuhnung ber chu September 1 daih tawha Patna-a ‘Voter Adhikar Yatra’ kharnaa hun a hman kha a ni a. Hemi ni hian hna nei lo tam, khawtlang intluktlan lohna, zirna chhia chungchang a sawi chhuak a, “Bihar hi a tho kang a nih chuan India hi a kang a ni mai,” a ti.
Hemi hnu thla hnih dawn chhung hmuh zui tur a awm ta lo thung a. Hetih chhung hian Prime Minister Narendra Modi, Home Minister Amit Shah, Uttar Pradesh Chief Minister Yogi Adityanath leh RJD hruaitu Yadav-a te chuan vawi tam vantlang inkhawmah hun an hmang tawh.
Congress candidate tam tak pawhin an hruaitu lawkte an inlan har lutuk chu an sawi ri tan a. An zinga pakhat chuan, “Mipuiin kan hruaitu lu awmna min zawt a, eng nge kan sawi tak ang? Gandhi chhungkaw tel lovin engtin nge mi rilru kan hmin ang?” a ti.
Bhagalpur-a Congress worker pakhat pawhin ni tin poster tar, roadshow buatsaih leh vantlang inkhawm huaihawtin hun an hmang a, Gandhi-a dawhsana a awm loh chuan a kim lo niin a sawi bawk.
Mahagathbandhan (INDIA) tan Yadav-a chu an campaigner pui ber a ni mek a. “Inthlan hi lungruala beih tur a ni a, thawhpuiten rilru khingbaia an beih chuan min thlawptute an tawp a, phur a rit thin,” a ti.
Congress thupuangtu, Pawan Khera-a erawh chuan, “Pu Rahul-a hun hman dan tur hi ruahman fel a ni tawh a, Bihar-a a inlanna tur tihfel vek a ni tawh,” a ti.
Gandhi-a a inlan tlem chhan hi chi thum a awm niin Congress chhungkaw hre chiang chuan an sawi a. An thawhpuite nena dinna bial insem leh campaign ruahmanaah state hruaitu leh hotu lawk inrawlh thuk chuan thawhhona a tichhe thei nia an hriat vang a ni a. Congress hian an thawh lehna theihna remchang nei tha zawk, Maharashtra leh Haryana an thlir nasa zawk a. Gandhi-a hian mipui bawr hup hupa chet chhuah aiin thil pawimawh bik leh thleng mil (issue-based politic) chu a thil kalpui dan thar a ni bawk tih a ni.
Gandhi-a inlan tlem hi BJP-in sawi nuam an ti hle thung a. Party thupuangtu, Sanjay Mayukh-a chuan, “Rahul Gandhi-a hian Bihar voter-te hi a ring lo va, indona mualah pawh a lo lang duh lo a ni,” a ti.