Dy Speaker hovin \hal chhunga kawngpui siam dan tur en

Dy Speaker hovin thal chhunga kawngpui siam dan tur en
Nimin khan Kolasib bialtu Lalfamkima, Dy. Speaker ni bawk hovin, Kolasib khawpui chhung leh Kolasib district chhunga Mizoram PWD enkawl kawngpuite thal chhunga siam that dan tur ngaihtuahin an thukhawm.
Lalfamkima chuan kawngpuite fur chhunga nasa taka a chhiat tawh avangin thal lo thleng turah working season a intan dawn a, chuvangin kan kawngpuite leh khawpui chhunga kawngte a theih ang anga siam that a pawimawh tih sawiin, heng kawngpui enkawltu PWD hotute chu an hma lak dan tur ruahmanna an neih dan te zawtin a sawipui.
PWD National highway EE, Er. Lalduhthlanga chuan an enkawl chin highway leh khawchhung inkawlpawhna thenkhat siam tha tura ruahmanna an kalpui thu sawin, hei bakah hian Bairabi to Bilkhawthlir National Highway 06 a hma an lak dan te sawiin, Zero point to Bilkhawthlir inkar tender chhangtu contractor Tanor Engineering Pvt. Ltd te chu an hna thawk tura vawi tam tak an hrilhhriat tawh thu a sawi.
Kolasib khawpui chhung kawng enkawltu Kolasib PWD Division EE Office chu Court thupek angin an Office kalhsak a ni a, an hmanraw thenkhat hrensak ni mah se, sorkar hmalaknain nimin khan court thupek stay order chu sut a nih thu H. Lalfakzuala EE Kolasib Division chuan a sawi a. Kolasib khawpui chhung kawng siamthatna tur sorkar atangin sum an la dawn loh thu sawiin, sum an hmuh veleh hna thawh nghal theih an beisei tih a sawi bawk.