Rio-a police beihpui thlaka thi zatin 132 tling ta

Rio-a police beihpui thlaka thi zatin 132 tling ta
Thawhlehnia Brazilian khawpui, Rio de Janeiro-a police-in beihpui an thlaknaa thi chu mi 132 an tling ta tih thuneituten an sawi.
Khawpui hmar lama mi rethei veng (favela) pahnih, Alemão leh Penha-a hmun hrang hrang an luhchilhnaa thi zat an sawi hi a tira an sawi zat let aiin a tam tawh.
Sorkar hnuaia dan hmanga mi retheite dinsaktu office chuan thi zat hi an puang a, hetih lai hian Nilaini tuk khan veng lun laiah ruang eng emaw zat zalh chu an chhungten an kil bawk.
Police-in tun tum beihpui an thlak hi khawpuia an chet chhuah tawha thi an tam ber tum a ni a, thuneitute chuan kum tam tak chhung mi sual pawlin mi rethei chenna veng an thunun chu chhuhsak an tum a ni.
Thi zat an sawi chungchangah hian Rio state Governor Cláudio Castro-a chuan thil chhui mek zel a ni a, thi zat hi tunah rih chuan 58 tih a nih thu leh ‘a la danglam thei reng’ tih a sawi.
Heti zat thi an awm hi President, Luiz Inácio Lula da Silva-a pawhin mak a ti a. Justice minister chuan Lula hian police chet chhuah hmaa sorkar laipui hrilh lawk an ni miah lo pawh mak a tih thu a sawi bawk niin a sawi.
Thi zat sawi pun hluai hma pawh hian United Nations Human Rights office chuan police beihpui thlakna chu ‘a rapthlak’ tiin a sawi bawk.
Nilaini tukah khan mi chengte chuan ruangte hi Penha-a kawnah an thutpui a, Brazilian chanchinbute chuan ruang 50 atanga 70 vel niin an tar lang.
Ruang tam tak hi a bul lawk tlang awih veng, police chet nasatna hmun ber atanga lak nia sawi a ni.
Mi chengte chuan Thawhlehnia thil thleng hi ‘indona ang mai’ tiin an sawi a, officer leh ralthuam keng dangte an inkap tawh a, inphen nan bus hal a ni bawk.
Police chuan mi sual pawlte hian drone hmangin officer-te chungah puak thei an thlak niin an sawi a, an chetna lai vel hi Red Command tia an sawi pawl chakna lai a ni.
“Hetiang hi mi sualten Rio police an lo hmachhawn dan a ni a, an chungah drone-in bomb an thlak a. Hetiang hi chu sualna pangngai a ni lo va, ruihhlo nena inzawm firfiakna a ni,” tiin Governor Castro-a’n a sawi.
Governor hian hnu an chhui hnuah thla hnih chhung che chhuak tura an inbuatsaih thu a sawi a. An mi man zingah Red Command tana drug dealer lawk pawh a tel niin asawi.
Governor hian social media-ah police officer thi pali thlalak a tar lang bawk.
Police-in beihpui an thlak mek lai hian Rio hi C40 World Mayors Summit an tih, khawvel khawpui lian 100 dawn mayor intawh khawm leh November 5-a Prince William-a’n Earthshot Prize a hlan tur dawng turin an inbuatsaih mek.