Land Revenue department-in customer care policy nei dawn

Land Revenue & Settlement department chuan Customer Care Policy a duang mek tih a changtu minister B Lalchhanzova chuan a sawi. Zirtawpnia Hnahthial district bawrhsap pisa-a Revenue office a hawnnaah minister chuan mipui tam takin Revenue department an sawiselna pakhat, dawr nuam lo an tih thinna chu hriain tunah chuan khami kawngah khan nasa takin hma an sawn tawh a. Dawr nuam tak department an nih zel theihnan tan an la tih a sawi.
An department dawrtu mipui tan Customer Care Policy an duang mek tih a sawi a. Chutih rualin mipui pawh thawktute ngaichang thiam a, tul loa tibuai chhen thin lo turin a chah.
An hmachhawp lian zingah licensed surveyor neih a tel tih a sawi a. Licensed surveyor-te hi ram teh leh a tul apiangah rate mumal tak nen chhawr an ni dawn a. Licensed surveyor leh empanelled firm 13 an chhawr mekte chuan indaihlohna tam tak an phuhruk a beisei tih a sawi a ni.
“State dangin an ngaihpawimawh deuh pakhat chu District Land Revenue a ni a, chu chu keini state tan ngat phei chuan sum hai luhna pawimawh tak a ni. Chuvangin mumal zawka chhiah lakluh a nih theihnan ‘land revenue reforms’ siam turin dan thar ennawn mek a ni,” Revenue minister hian a ti.
Hnahthial tan Revenue quarters sak mek a ni a, Vairengte-ah pawh pilot project angin special deuh hlekin ruahmanna an siam tih a sawi. Mahni awmhmun atanga file thlen chin hriat theihna tur – online file tracking system an bawhzui mek tih sawiin, “Hei hian file hup bo, file tang leh tih bo tam lutuk a tihreh kan beisei,” a ti.
Land Revenue & Settlement secretary Vanlalmawia sawi danin, Revenue office chu district administration nen chak taka thawh ho tir an tum avangin district thar pathumah chuan Revenue office hran awm tawh loin, bawrhsap office-ah beh tir an ni tawh. Ram chungchanga buaina tam tak awm thin chinfelna atan Revenue Court mumal tak neih tumin an bawhzui mek a, settlement officer (SO) chu assistant commissioner (AC) tia hming thlak turin an buaipui mek bawk.