BIHAR INTHLAN: JD(U) candidate Anant Singh man

BIHAR INTHLAN: JD(U) candidate Anant Singh man
Bihar Police chuan an state assembly inthlan lo awm tura Janata Dal (United)-in Mokama-a an dintir, Anant Singh-a leh a thuihhruai pahnih chu Jan Suraaj candidate Piyush Priyadarshi-a tana campaign-tu, Dularchand Yadav-a thihna kaihhnawihah Inrinni zan khan an man.
Patna District Magistrate (DM) Thiyagrajan S.M. leh Senior Superintendent of Police (SSP) Kartikey Sharma chuan Pathianni zing dar 03:00-a thuthar la khawmtute an kawmnaah MLA hlui, Singh-a leh a thuihhruai, Manikant Thakur leh Ranjit Ram te man an nih thu hi an sawi.
A hma lawkin Election Commission of India (ECI) chuan Barh Sub-Divisional Officer (SDO) leh Sub-Divisional Police Officer (SDPO) te chu an hna atangin a lo chawlh lailawktir tawh bawk.
Police officer-te chuan Singh-a hi police-in beihpui an thlakna, Central Armed Police Forces (CAPF) mi 150 vel telnain Patna thingtlang lam, Barh leh Mokama vel an luhchilhnaah Inrinni zan khan an man a, thu zawh fiah tura Patna-a lak zui a ni tih an sawi.
“October 30 khan candidate pahnih tantute hi an intibuai a. Lunga invawmin hliam pawh an awm a. Dularchand Yadav-a ruang hi a hnuah hmuh zui a ni ta a. Lehlam lehlam hian thubuai an ziak lut ve ve a, police-in an chhui mek zel a ni,” tiin SSP-in a sawi.
SSP chuan finfiahna, thil thleng hmutu leh postmortem report behchhanin ‘Model Code of Conduct (MCC) bawhchhiatna a awm ngei a. Candidate Anant Singh-a awm laia thleng niin Barh court-ah inlantir an ni ang,” a ti.
“Thi ta hian a keah silaia kahna a tuar a. Post-mortem report-ah chuan thah a ni a. Silaimu hi hmuh a ni lo va, kah tlang a ni,” a ti.
Dularchand-a hi Jan Suraaj tana ting, Priyadarshi tan campaign-in Ningani chawhnua Mokama Tal-a buaina chhuakah khan a tel a. A tupa, Neeraj Kumar-a’n FIR thehlutin hetah hian Singh-a leh a unau fate pahnih, Karamveer leh Ranveer te chu a tituah a puh a ni.
A khingpui man a nih chungchangah Priyadarshi chuan, “Zirtawpni khan Anant-a hi lirthei 50 inzuiin an campaign a. A laka FIR ziah luh a nih chuan man thuai a ni dawn a, tih loh ai chuan a tha a. A pawimawh ber chu police-in an chhuina kal zel leh a tuartute chhawmdawlna lam a ni,” a ti.
Hetih lai hian ECI chuan Patna Rural SP thlaktu tur pawh a puang tawh a, mi dang pathum pawh an hna an thawh that loh avangin an chunga hremna lek hmabak an ni bawk.