Ruihhlo ngai camp siamna atan sawrkarin nuai 113 a seng tawh

Ruihhlo ngaite chhanchhuahna atana sawrkarin Hulhliap Short Stay a buatsaihah cheng nuai 113 a seng tawh a. Mi 800 chuang enkawl an ni tawh. Social Welfare minister Lalrinpuii sawi danin, an chhungte pawhin an enkawl hleihtheih loh, ruihhlo bawiha tang laklawhte tlawmngaia lo enkawltu – home hrang hrang chu nasa taka sawisel an ni a. Ruihhlo ngai enkawlna home thenkhat ami, thalai sang rual an chhuak huk a, tam tak mahni inah pawh let duh loin Aizawl khaw chhung hmun hrang hrangah an vak darh a. Nunau an thlamuang loa, tuamhlawmtu nei lo, mi riangvaite chu tuamhlawm turin theihtawp an chhuah tih a sawi.
“Sawrkar chakna ringawt chuan kan thei lo tih hriain NGO leh kohhran puihna ngenin, an ni ho nen hian Hulhliap Short Stay kan duang chhuak a. Mizoram Synod-in phal takin Synod Revival Camping Centre min hmantir a, ni 20 chhung camping neih thin a ni. Heta an lo chhuah veleh After Care Follow up tiin volunteer – psychologist leh social worker mi 100 rual velin an umzui a. Kartin an inah tlawhin thla thum chhung an vil zui thin,” a ti.
Hemi chhung hian ruihhlo bansan tak tak leh tumna nei mi 60 chuangin skill training an paltlang tawh tih a sawi a ni.
Hulhliap Short Stay programe-ah hian mi 817 vel enkawl an ni tawh a, tunah batch 5-na kalpui mekin November 17-ah batch 6-na kalpui leh tum niin, hetah hian zu avanga harsatna tawkte thlur bing an ni thung dawn tih a sawi.
Tun thlengin ruihhlo veite enkawlna atan sawrkarin cheng nuai 113 a seng tawh a, ruihhlo bawih atanga chhuak thalaite tan sawrkar flagship programme – Bana Kaih hnuaiah pawh ruahmanna siam mek a ni tih Social Welfare minister hian a sawi a. “Ruihhlo ngaite vei em emtu chief minister zarah sawrkar pawhin rang takin kan sum mamawh min pe chhuak thin a, a lawmawm takzet a ni,” a ti.
Hetihlai hian Hulhliap Short Stay Centre batch 5-na neih mekah camp-a lut chhungte chu Sponsorship & Referral Services Task Group ruahmanin Thawhtanni khan sawmkhawm an ni a. He Task Group member pahnih – MZU professor Dr Henry Zodinliana Pachuau leh Moses Zofaka (Mizoram Drug Users Forum) bakah State Social Welfare & Rehabilitation Centre counsellor Vanlalchhanhimi te resource person-a hman an ni. Hulhliap camp-a lut mekte an lo chhuah huna an nu leh pa, chhungten an lo dawnsawn dan tur an inhrilh a. Hulhliap volunteer-te kaihhruaiin an inkawmho a ni.
Hulhliap Short Stay Centre camping hi thawh 5-na neih mek a ni a, thawh 6-na November 17-a luh tur niin, December-ah erawh camp a awm loang. Ruahman dan chuan 2026 March thleng kalpui tum a ni.