Youth Fest-ah Govt HBC zirlai tel

Youth Fest-ah Govt HBC zirlai tel
Prajatantra – 2025: National Youth Festival Mumbai-a neihah Govt. Hrangbana College atangin finalist – Romawizuala, (English 5th semester), Adila Zosangkimi (Political Science 5th semester) leh Lalkroshlui (Political Science 3rd semester) an tel a. Youth Festival intihsiakna thupui chu “Artificial Intelligence for Sustainable Cities” tih a ni.
Intihsiak hi UN Habitat leh sawrkar laipui National Institute of Urban Affairs bultuma praja.org in kumtin an buataih thin a ni a. Khawpui inrelbawlna tha zawk nei thei tura thalaiten rilru an sen theihna atana buatsaih a ni. Intihsiak hi chhawng thum niin elimination, second round leh final round neih thin a ni a, field work hautak tak neih a ngai bawk thin.
Govt. Hrangbana College atanga telte hian Aizawl Municipal Corporation chungchang zirin AMC-a deputy mayor, corporator leh office-a thawkte an kawm a ni.
Final hi October 31 – November 3 chhung Mumbai-ah neiin, Romawizuala hi Op- Ed Writing competition-ah pakhatna a ni.
Youth Festival buatsaihtute hian participant-te kal leh haw man bakah thlenna an tum sak a. Govt HBC hi kum 2023 atangin an tel tawh a, kumtin final an lut ziah thin. Kum 2024-ah erawh final round hi MZU exam nen a innang a, an kal thei lo a ni.