Khaw khatah vote khat a awm Vote a thlak dan tur ruahman

Khaw khatah vote khat a awm
Vote a thlak dan tur ruahman
Lai Autonomous District Council inthlanpui neih a ni dawn a. Hmawngbuchhuah khuaah chuan vote khat chiah a awm. Vote thlak chu a dikna chanvo a nih angin vote a thlak ngei theihnan ruahmanna siam a ni.
The Aizawl Post thudawn danin, Hmawngbuchhuah hi Sekulh MDC bial chhunga awm a ni a. Lawngtlai district-a Myanmar ramri bul Zochachhuah thlen hmaa awm a ni. LADC inthlanpui hnuhnung berah khan voter 204 a awm a, mipa 93 leh hmeichhia 111 a ni.
A cheng tam zawk hi ramdang mi niin, Zakhai leh Kawl an ni ber. Kumin LADC inthlanpuia hman tur electoral roll chu uluk zawkin buaipui a ni a, voter pakhatah chauh an tla thla tih thu dawn a ni.
The Aizawl Post-in a lo zawh tawhnaah Lawngtlai district election officer, bawrhsap Donny Lalruatsanga chuan he khuaah hian LADC emaw MLA inthlan emaw neih tawhnaah voter awm nual thin mah se, tun tumah hian uluk zawka endiknaah, recognised schedule tribe an nihna tihchianna document pholang thei an awm mumal loa, voter pakhat chauh hian a paltlang thei tih a sawi.
State election commissioner Dr H Lalthangliana chuan, vote khat chauh a awm chhan hi dan dik taka electoral roll kalpui vang a ni tih a sawi a. Vote nei awmchhun hian a dikna leh chanvo ang taka vote a thlak theihnan ruahmanna siam a ni tih a sawi.