Sudan-a RSF-in mangangte puih theih nan inkahhai pawm

Sudan-a RSF-in mangangte puih theih nan inkahhai pawm
Sudan-a paramilitary Rapid Support Forces (RSF) chuan US-in inkahhai kalpui an rawtna an pawm tih Ningani khan an sawi.
Sudan-a sipai kaihhruai sorkar erawh chuan engmah an la sawi ve lo va. RSF hian khawthlang lam, Darfur region-a el-Fasher an lak hnuah rawtna an pawm thu hi an puang a ni.
UN-in a ngen chungin thla 18 chhung zet puihna luhna an dang a, hei hian a cheng tam tak tamin a awmtir a. UN-hnuaia tam dinhmun ngaihventu chuan khawpui chhungah tam a tla tih an sawi.
RSF hi an sipaiten mi an that nasat avangin ram dangte sawisel pawh an hlawh hle a, anni erawh chuan chutiang an tih loh thu an sawi a. Mi mal dan lo bawhchhia leh tute emaw man erawh an nei ngei tih an sawi thung.
Sudan-ah hian sipai leh RSF inkarah April, 2023 atang khan an indo tan a, inkahhai pawh an pawm fo tawh a; mahse, a taka kalpui erawh a awm thei lo.
September khan US kaihhruaiin United Arab Emirates, Saudi Arabia leh Egypt chuan mihring mangang lutuk chhawk nan thla thum inkahhai an lo rawt a, hei hi inkahhai pangngaia chhunzawma mipui rorelna kalpui thar lehnain zui tura ruahman a ni.
RSF chuan thu an chhuahah ram palite rawtna hi ‘indona avanga mihring manganna nasa avang’ leh ‘rang taka puihna’ a luh theih nan an pawm tih an sawi.
An pawl hian buaina chhuah chhan ber ching fela indo titawp tura sawiho zel pawh an duh tih an sawi bawk.
RSF-in thuchhuah an siam hma, Thawhlehni khan Sudanese Defence Minister Hassan Kabrounchuan US President Donald Trump-a sorkarin ‘muanna a awm theih nana a beihna leh rawtna an neih’ avangn lawmawm a tih thu an ram television-ah a lo sawi ve tawh bawk.
Hetih rual hian Sudanese mipuiten RSF an duh lohna chu a la nasa hle tih a sawi a. “Indo tura kan inbuatsaihna hi kan ram dikna hum nan a ni,” a ti.
Nairobi-a Sudan chargé d’affaires Mohamed Osman Akasha chuan Nilaini khan sipai sorkar chuan RSF chu thiaha an ralthuam an tun chauhvin indo an titawp duh dawn niin a sawi thung.
“Inkahhai rawtna hi engmah ka la hre ve lo va. Ka hriat chin chu Sudan sorkar hian Sudan-a mi chengte duh angin helho hneh hi a duh a ni,” a ti.