State Medical Council-a inziaklut lo doctor tan damlo a en theih loh

State Medical Council-a inziaklut
lo doctor tan damlo a en theih loh
Mizoram State Medical Council-a inziak lut lo medical doctor-ten Mizoram chhungah damlo an en tih hriat a nih avangin Lunglei district bawrhsap chuan an district huamchhungah hetiang mi hian damlo en lo turin a hriattir.
Lunglei district bawrhsap Navneet Mann chuan thupek tichhuakin, Mizoram State Medical Council (MSMC) atanga hriattirna lehkha hmuh a nih angin, Mizoram pawn lam atanga doctor/ damdawi lama thiamna nei thenkhatten MSMC-a inziaklut hmasa loin Mizoramah damlo an en thin tih hriat a ni tih sawiin, hei hi dan phal loh a ni tih a sawi.
Mizoram Medical Council Act 2010 leh National Medical Commission Act 2019 section 34 hnuaiah hetiang mi hi hrem theih an ni, tiin, ‘He dan hian mi tumah, khawi state-ah pawh an thiamna /damlo enkawlna hmanrua anmahni chenna State Medical Council-a inziah luh hmasak loh chuan hman phal a ni lo,’ a ti.
Hei vang hian, MSMC-a inziah luh loh chuan Mizoramah doctor-in damlo a en thei lo tih bawrhsap hian a sawi a. Private hospital, nursing home, charitable institution, NGO leh non-government health facility zawng zawngin State Medical Council-a inziak lut lo doctor chhawr /hna pek theih a ni lo tih a sawi.
‘Mi tu pawhin doctor a rawn dawn a nih chuan, MSMC-ah a inziak lut em tih a hrechiang phawt tur a ni a. Medical camp emaw damlote tana tha tur emaw buatsaih a nihin, MSMC chuan hun reilote atan phalna a pe thin a. MSMC phalna la loa hma lak a nih hriat chuan hremna pek theih a ni,’ a ti.