CYMA leh NHIDCL-in kawng sawi

CYMA leh NHIDCL-in kawng sawi
NHIDCL leh an hnuaiah contractor (Sairang leh Vairengte inkar kawng siamtute) chu Zirtawpni khan Central YMA chuan an office-ah lengah sawmin an inkawm.
Central YMA-in Sairang leh Vairengte inkar kawng a en tuma hmalak mek leh kalpui zel dan tur sawiho niin, kawng siam chu December chawlhkar hmasa berah tlawh leh an tum a, chutah chuan uluk zawkin hnathawh dan en tum a ni tih hrilh an ni. Sairang leh Vairengte inkar kawng siamthat mek chu enpui reng an tum tih an hrilh bawk.
Contractor-te hian December 20 chhoah Kolasib leh Rengtekawn inkar chhe zual lai black topping tih hman an tum a. Buichali leh Khamrang inkar pawh hemi velah tho hian black topping an tum tih an sawi.
Inkawmhonaah hian NHIDCL executive director Adelbert Susngi leh hotu dangte an tel a, an hnuaia contractor pathum pawh telin, Central YMA lam hi president R Lalngheta leh hruaitu dangte an tel a ni.
Zirtawpni vek khan Barak Valley Cement Limited (Valley Strong) hotute chu Central YMA hruaitute an kawm a. Mizoramah rel a lo luh hnu ah pawh cement man la tlawm theih loh chungchang sawi niin, hemi kawnga hma lak dan ngaihtuah nise an ti.