Dampa-ah 2028 inthlanpui hlimthla a lang – Lalruatkima
Dampa-ah 2028 inthlanpui hlimthla a lang
– Lalruatkima
Dampa bial by election neih zawh takah 2028 MLA inthlanpui hlimthla a langchiang tih MNF hruaitu Lalruatkima chuan a sawi.
Inrinni khan Luangmual MNF Unit huaihawtin Lungmuala Martar Thlanmualah Zo Kut ‘Hnam martarte sunna leh rammute chawimawina’ hman a ni a. Zoram tana zalenna sualtute hnenah chawimawina thuchei leh thangchhuah diar hlan a ni.
Hmanpuitu MNF treasurer Lalruatkima chuan, hnam pasaltha tam takin Mizo hnam tan nunna an hlan a. An nunna hlu tak kha hlan lo se, kan ram awm dan tur chhut thiam a har hle tih a sawi. “Mahni puala ram nei lo hnam tan tak an awm laiin, keini chuan ram mawi leh tha tak Pathianin min pek hi kan zah a, kan enkawl thiam a pawimawh hle. He hnam leh he ram, kan piputen an lo humhalh a, an lo sah zau hi kan humhim tlat tur a ni,” a ti.
Hnam pasalthate leh martar-te chu Mizo hnam a awm chhung chuan an hming a dai lo dawn loa, kan hrereng dawn nia sawiin, “Hnam tam tak an ral tawh a, kan hnam a ral ve mai lohnan theihtawpin kan hnam ziarang leh nun dan kan chhawmnung tur a ni. Kan hnam nunphung hi midang, hnam dangin min rawn chawilar sak loang, keimahni ngeiin kan humhalhin kan chawilar tur a ni,” a ti.
Kum 1986-a remna ziah a nih khan remna avanga lo chhuakte tan Maumualah ram mi 653 hnenah pek an ni a. Khatih lai khan tlemin a la ramhnuai deuh a, chei a ni mai lo tih Lalruatkima hian a sawi. 2022 April khan MNF sawrkar chuan cheithata chinfel tha a ti a. DM&R department atangin sum, nuai 50 sanction a ni a. Committee din niin Ex MNA leh PAMRA aiawh telin, housing complex fel tak, in zawng zawng kawng an vek turin ruahman a ni tih a sawi.
“Hna thawh char char a ni a, kawng pawh laih fel vek hman a ni. Teh that leh niin in hmun 720 a chhuak ta a. Pass siamthat hna hi MNF sawrkar khan a peih hman ta lo a ni. A field work zawng zawng kan sawrkar khan kan peihfel vek a, table work tlem tun sawrkarin a thawk ve chauh zawk a ni. ZPM sawrkar tih vek angah mi tam takin a ngai hi a dik lo,” a ti.
Mipuiin ZPM an enchhin chu an inchhir tih a lan thu MNF treasurer hian sawiin, “Dampa bial by election atangin ram hruai leh tur an teh a, party tinin theihtawp an chhuah a. MNF candidate Dr R Lalthangliana thlan tlin a ni ta a ni. Kum 2028 inthlanpui neih tur hlimthla Dampa bial by election-ah khan a langchiang a ni,” a ti.