Kum zabi 21-na a songwriter tha ber Max Martin

Khawvela hla lar ni tur chuan US singles chart, Billboard Hot 100 a lan theih a ngai a, he chart-a No.1 kai thei chin chu khawvela hla lar a ni nghal deuh zel mai. US hi entertainment hmunpui a nih miau avangin khawvel hriat ni tur chuan US-a lar tel a ngai tlat!
Tun kum zabi thar, kum zabi 21-naah kum 25 kan hmang tling ta a (2000-2024), he kum zabi thara kum 25 chhunga Billboard Hot 100 chart-a No.1 kai thei hla phuah tam dan atanga tehin, kum zabi 21-naa hlaphuahthiam zinga a thazual 25 an thlang chhuak a, No.1 chu Max Martin a ni a, a hlaphuah he chart-a No.1 kai thei 26 a nei thei a, chung zingah chuan Maroon 5 sak ‘One More Night’ kha No.1 ni rei berin, 2012 khan kar 9 a No.1 thei.
Swedish hlaphuahthiam leh producer hriathlawh Max Martin hian zaithiam lar tak tak a lo thawhpui tawh zingah Taylor Swift, Lady Gaga, Ariana Grande, Lizzo, Pink, Ellie Goulding, Justin Bieber, Lana Del Rey, Katy Perry, Kesha, Demi Lovato, Bon Jovi, Adele, Usher, Selena Gomez, Kelly Clarkson leh The Weeknd te pawh an tel a, 90s star lamah pawh Britney Spears, NSync leh Backstreet Boys thlengin a lo thawhpui tawh bawk.
Tun kum 25 chhung hian Hot 100 chart-a No.1 kai thei hla a tam hman tawh khawp mai a, hla lar tak tak pawh a tam ‘We Belong Together’, ‘We Are Never Getting Back Together’, ‘Bootylicious’, ‘Way 2 Sexy’, ‘Angel’ te, ‘Butterfly’ leh ‘Fireflies’, ‘Grenade’, ‘Party Rock Anthem’, ‘A Bar Song,’ ‘Emipre State of Mind,’ ‘California Gurls’ te pawh a huam vek.
Hla phuahtu hi mi pakhat chauh ni lo, inphuah tawm pawh a tam hle a, tun kum 25 chhunga Hot 100 chart-a No.1 kai thei hla phuahtu zinga chhiar tel pawh mi 1,000 dawn an tling a, producer pawh 300 chuang an ni. Zaithiam bawk hlaphuahthiam ni bawk an awm a, zaithiam thenkhat mi hlaphuah sa an awm a, zaithiam ni lem lo, hlaphuahthiam em em si an kat nuk bawk.
Top Songwriters of the 21st Century a Top 25 te hi Hot 100 chart-a No.1 kaithei hla paruk chin nei thei vek an ni a, top 8-te phei chuan hla 10 an nei tling vek bawk.
Top Songwriters of the 21st Century Top 25:
1. Max Martin (26)
2. Dr. Luke (18)
3. Drake (14)
4. Taylor Swift (12)
5. Beyoncé (11)
6. Mikkel Eriksen (10)
7. Tor Hermansen (10)
8. Shellback (10)
9. Cirkut (9)
10. Bruno Mars (9)
11. Louis Bell (9)
12. Ariana Grande (9)
13. Katy Perry (9)
14. Timbaland (8)
15. Jack Antonoff (8)
16. benny blanco (8)
17. Justin Bieber(8)
18. Philip Lawrence (8)
19. Pharrell Williams (7)
20. The Weeknd (7)
21. Jermaine Dupri (7)
22. Fergie (7)
23. Sean Garrett (7)
24. Ye (6)
25. Jay-Z (6)