BP sang control nana zingkar in tur \ha

Zingkar kan thawhhlim a kan awmdan hian ka nileng awmdan tur a hril e an ti thin. BP sang nei tan pawh zingkara kan thil in hmasak ber hian kawngro a su thei niin mithiam ten an sawi a, in tur dik kan in chuan lung hnathawh a lo tha sawt a, circulation leh taksain stress a response dan thlengin a nghawng thei niin an sawi. Thil tui hmel leh hrisel hmel hi thil tha a ni vek kher lo a, a landanah buai loh phawt tur a ni. Tun tumah hian Times of India-in BP sang control nana zingkara in tur tha ni a an sawi te kan rawn tarlang e.
1. Tuilum leh sertui: Tui lum no khatah sertui han sawr zauh la, chu chu ni bul tan nana in tur tha tak a ni. Ser-ah hian vitamin C a tam a, chu chu natural antioxidant niin, oxidative stress a tihniam thei a ni a, oxidative stress chu BP tisangtu pakhat a ni. NIH a zirchianna an tarlanah chuan vitamin C tama chaw regular taka kan lak luh hian systolic blood pressure tlemin a tihniam ve thei. Hei bakah hian taksa a vawng hnawng a, chu chu thisenzm tan tha tak a ni. Chutihrualin, i tui lum in turah kan sertui sawr tam lutuk tur a ni lo, a thur leh lutuk chuan acidity siamin, pum a tinuam lo ve leh thei thung.
2. Beetroot juice: BP sanga in tur tha an sawi apiangin beetroot juice hi an hmaih ngai lo. Dietary nitrate a pai hnem a, chu chuan kan taksain nitric oxide a siamchhuahna kawngah a pui. Nitric oxide chu compound, kan thisenzam tihahdam theitu, tisen luang vel ti-smooth-tu a ni. Beetroot juice tharlam (chi emaw chini emaw pawlh loh) hi BP sang enkawl nana zingkar in tur tha tak a ni.
3. Coconut tui: Coconut tuiah hian potassium a tam hle a, chu chu kan taksa-a sodium level siamthatu mineral pawimawh tak a ni. Kan taksaah sodium a tam lutuk chuan BP a tisang thin. Coconut tui siam danglam loh hi electrolyte balance vawngtu a ni bawk. Chutihrualin in mai theih tura bur a an thun sa dawra an zawrhah te hian chini emaw chi emaw an pawlh duh khawp mai tih hriat tur a ni. Coconut tui chu a tha tih vanga tawngpawng in theuh tur a ni chuang lo tih pawh hriat tel tur a ni.
4. Green tea: Green tea-ah hian caffeine tlem a awm ve a, catechins a pai hnem hle bawk. Catechins chu tisenzam hnathawh tithatu compound a ni. The American Journal of Clinical Nutrition (2014) a an tarlan danin green tea hi regular taka rei deuh hlek in thinin BP tlemin a tihniam ve thei. Caffeine tlem awm ve mah se caffeine tamna black coffee te angin BP sang zuai (temporary raise) a thlen ve lo. Chutirualin, green tea pawh a tha tih vanga tak deuh deuha in tur a ni lo a, tlema dal deuh raih a in a tha zawk.
5. Sunhlu tui: Sunhlu hi superfruit an tih zinga mi a ni a, vitamin C a pai hnem bakah polypenols leh flavonoids a pai hnem bawk a, heng te hi lung leh thisenzam chhe tur vengtu tha tak an ni. Zingkara sunhlu tui tlem in thin hi lung hriselna atan a tha viau a ni. Chutirualin chi leh chini te pawlh loh tur a ni.