Dampa-ah mawng sawh dawta tla chu kan ni lo – ZPM president

Dampa bial by election-a an chak loh dan chu mawng sawh dawta tla chu an ni lo tih ZPM president Lalliansawta chuan a sawi.
Thawhtannia an party office-a inkhawmah ZPM president chuan, Dampa bial inthlanah chak tura inngai an chak lo tlat a, inthlan an hmachhawn tawhah amah phei chuan chak a inrin ber tum a ni hial tih a sawi.
Polling station 41-a 20-ah an sang zawk a. PS 18-ah MNF an chak a; hmun khatah an inhnehtawk a, a vote number-a chhut a nih avangin an tla a ni mai a, an hneh lo lem loa, mawng sawh dawta tla an ni lo tih a sawi.
“Chak loh takah chuan puhmawh tur a awm nual thin a, kan candidate pawh a inthlahrung viau tih a hriat. Puh tur a awm a nih chuan party president hian mawh ka phur a ni,” Lalliansawta hian a ti a. An campaigner-ten theihtawp an chhuah a, minister leh MLA-te pawh an tang a, ZPM vote-tute chungah lawmthu an sawi tih a sawi bawk.
LADC inthlan turah candidate set a buaithlak a, Search Committee dinin kumin kum tir atang khan hma an la tawh a, mi tha tak tak 25 an thlang chhuak tih a sawi.
“Lawngtlai district mipui ka chah duh chu, rilru puitling takin awm ila, LADC hmasawnna tur kan ngaihtuah a ngai. Kalphung thar mipui sawrkar kan din duh tak tak a nih chuan rilru fim kan put ka duh. MDC kalphung hrim hrim hi siamthat a ngai hle a, mipuiin kan ram hmasawnna tur hi a zar an zo a ngai,” ZPM president hian a ti.
State sawrkar behchhana sawrkar siam turin Lai mipui a chah tih sawiin, state sawrkar nena hrui khat vuana tan tlan a tul tih hriaa ZPM candidate-te vote turin a ngen tih a sawi a ni.