India badminton champion: Ramsanga!

Ramsanga!
November ni 18-24, 2025 chhunga Arunachal Pradesh khawpui Itanagar-a khelh zawh tak Yonex-Sunrise 48th Inter State – Inter Zonal & National Junior Badminton Championship 2025-ah Durtlang rawlthar C. Lalramsanga s/o C. Lungmuanpuia leh a partner Sumith AR-te chu boys’ doubles category-ah an champion a; mixed doubles category lamah pawh Taarini Suri nen tangdunin Ramsanga hian lawmman pathumna a hlawhchhuak bawk.
Ramsanga leh a kawppui Karnataka lam mi Sumith-te hian seeded no 3 ni chungin inelna an hmachhawn a; round of 32-ah Mizoram pair Sainunmawia Sailo leh Malsawmhlua tangdun chu 21-16, 21-19-in an hneh.
Round of 16 stage-ah Manipur lam mi Malemnganba Singh Heman leh Amarjit Singh Khwairakpam inkawp chu 21-17, 21-18-in an hneh leh a; quarter-final lamah seeded no 8 Aman Aneesh leh Yudhajit Reddy Padigepati tangdun chu 17-21, 22-20, 21-16-in deciding game ah an hneh leh bawk.
Semi-final match-ah seeded no 2 vawtlatu Charan Ram Thippana leh Hari Krishna Veeram Reddy-te thawkdun chu 21-13, 18-21, 21-11-in an hneh leh a; final-ah pawh harsatna nei loin Bhargav Ram Aggirella leh Viswa Tej Gobburu thawkdun chu 21-13, 21-12-in an hneh a, India champion an ni ta.
Ramsanga hi nikum lamah Vishakha Toppo nen tangdunin mixed doubles category-ah national champion an lo ni tawh a, kuminah boys doubles category huangah India champion a ni nawn leh ta a ni.
Mixed doubles category huangah pawh Ramsanga hian Maharashtra lam tleirawl Taarini Suri tanpuiin, champion tura beiseiawm ber zinga mi an ni a; semi-final lamah Vansh Dev leh Angel Punera-te tangdun lakah chesualin, 21-19, 21-10-in an tlawm a, lawmman pathumna a dawn phah ta a ni.
An pahnih hian BWF Super 300 tournament Syed Modi India International 2025 khel turin Lucknow lam an pan leh nghal nghe nghe.
Team inelnaah Mizoram Boy’s team-te a vawi khatna’n gold medal a lakpui hnuah mimal inelna lamah Ramsanga’n a thatzia leh India player beiseiawm berte zinga mi a nihzia a rawn nemngheh belhchhah ta a ni.
Mizoram Badminton Association thuchhuah chuan heti ang player tha leh theihna nei sang Mizoramin a nei chu ropui a tiin, a chhuang takzet tih an tarlang a, hei aia sang zawk thleng chho zel tur leh Mizoram leh India ram tihmingthatu ni zel turin duhsakna sang ber a hlan nghal bawk.