Tun thlaah two wheeler thar 1100 chuang: Hnathawhna lirthei thar a tlem

Mizoramah lirthei a pung chak a, lirtheiah pawh thla tina pung nasa ber chu two wheeler a ni ziah. Tun thlaah pawh two wheeler hi 1,100 chuang a awm tawh.
Transport department-in an chhinchhiah danin, tun thlaah Mizoramah lirthei thar 1,637 ziah luh a ni tawh a, chung zinga 1,169 chu two wheeler a ni.
Two wheeler 1,169 bakah two wheeler taxi pakhat a awm bawk a, three wheeler (auto rickshaw) pasarih a awm bawk.
Two wheeler dawttu chu light motor vehicle a ni a, tun thlaah 293 ziahluh thar a ni tawh. Hei hi motor car a ni.
November thlaa ni 25 thlenga lirthei thar awm zat hi thla hmasa nena khaikhin chuan a tam tia sawi tur khawp a ni rih lo a, October thlaa lirthei thar awm zat kha 2,815 a ni.
Lirthei tharah hian hnathawhna lirthei a tlem a, thla tinin, kum tinin hnathawhna lirthei thar hi a tlem ziah.
Lirthei thar hi transport leh non transport titein an then e, sum thawh chhuah tumna lirthei transport 169 leh non transport 1,468 a awm.
Kuminah thla khat chuang hret a la awm a, lirthei chhiah chu nikuma hmuh zat aia tam a lut tawh. Amaherawhchu, nikum khan lirthei atanga sum hmuh hi a tlahniam duai a, hei vang hian khum a awl ve bawk mai thei.
Transport department-a lirthei chhiah (revenue collection), kumina lut tawh hi Rs 41,72,73,732 a ni a, 2024-a kum tluana sum hmuh kha Rs 40,02,80,793 niin, 2024-a sum hmuh hi 2023-a sum lut aiin -3.53%-in a tlem a ni.
Tun thlaah hnathawhna lirthei thar
8 Goods carrier thar 137 a awm
8 Three wheeler (passenger) thar 7 a awm
8 Motor cab thar 22 a awm
8 Bus thar 1 a awm
8 Ambulance thar 1 a awm
8 Two wheeler taxi (scooter-Used for hire) thar 1 a awm