Record siamin Billboard 200 leh Hot 100-ah Taylor Swift a No.1

Last updated Nov 26, 2025 6 0

Record siamin Billboard 200 leh Hot 100-ah Taylor Swift a No.1
Taylor Swift album ‘The Life of a Showgirl’ hi Billboard 200 (US albums) chart-ah a No.1 a, he chart-a kar sarih a No.1-na niin, he album-a a hla ‘The Fate of Ophelia’ pawh Billboard Hot 100 (US singles) chart-ah a kar sarih nan a No.1 bawk a, Taylor Swift hian chart record a siam a, Billboard 200 (albums) chart leh Hot 100 (singles) chart-ah, chart-a an lan tan atanga kar sarih chhung a zawna No.1 ni ve ve thei hmasa ber a ni.
Hetihrual hian Summer Walker, NF leh 5 Seconds of Summer te pawh Billboard 200 chart top 10-ah an debut a, Krismas rim a nam leh tan ta bawk a Hot 100 lamah Mariah Carey Krismas lengzem hla chuai thei lo ‘All I Want for Christmas Is You’ pawh top 10-ah a rawng lang leh ta a, December thla kan kai meuh chuan he hla hi chart-ah a No.1 leh ngeiin a rinawm.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla, a mala hralhna atanga album tlukpui te belhkhawm thin a ni.
The Life of a Showgirl hi kar khat chhungin US-ah 93,000 an hralh leh a, chung zinga 75,000 chu streaming (on-demand official stream maktaduai 98.49) niin, album tak tak hralh chu 17,000 a ni a, album-a hla a mala hralhna atangin 1,000 a tling thei bawk.
Summer Walker album thar ‘Finally Over It’ chu 77,000 hralhin, No.2-ah a debut a, 69,000 chu stream (on-demand official stream maktaduai 91.88) niin, album tak tak hralh chu 8,000 a ni a, hla mal hralhna chu chhiar tham a ni lo. Summer hian he chart top 10-a lang thei album pali a nei tling ta a, kumina hmeichhe R&B album tlangzarhah chuan a kar khatnaa hralh tha ber a la ni bawk.
Chart No.1 hlui Morgan Wallen “I’m the Problem” chu 76,000 hralh lehin No.2 atangin No.3-ah a tawlh ve thung.
NF album thar ‘FEAR’ chu 76,000 tling lo deuh hralhin No.4-ah a debut a, chung zinga 48,000 chu album tak tak hralhna niin, streaming atangin 27,000 a tling thei a, hla mal hralhna atangin 1,000 a tling thei bawk. ‘FEAR’ hi NF album chart top 10-a lang thei pangana a ni.
Chart No.1 hlui KPop Demon Hunters soundtrack chu 68,000 hralh lehin No.3 atangin No.5-a a tawlh ve ta bawk.
5 Seconds of Summer album thar ‘EVERYONE’S A STAR!’ chu 51,000 hralhin No.6-ah a debut a, chung zingah 41,000 chu album tak tak hralh niin, streaming atangin 9,000 (on-demand official stream maktaduai 11.33) niin, hla mal hralhna atangin 1,000 a tling thei bawk. 5 Seconds of Summer hian top 10-a lang thei album pasarih an neihna a ni.
Olivia Dean ‘The Art of Loving’ chu 50,000 hralh lehin No.5 atangin No.7-ah a tawlh a, chart top 10-a lang dang zawng chu No.1 hlui vek niin, Sabrina Carpenter ‘Man’s Best Friend’ chu 35,000 hralh lehin No.6 atangin No.8-ah a tawlh a, SZA ‘SOS’ chu 33,000 hralh lehin No.7 atangin No.9-ah a tawlh a, Morgan Wallen ‘One Thing at a Time’ chu 29,000 hralh lehin No.9 atangin No.10-ah a tawlh ta bawk.
Billboard Hot 100 hi kar khat chhunga US-a hla lar dan tehna a ni ve thung a, chart ranking siam nan hian all-genre US streaming (official audio leh official video) a ngah dan te, radio airplay ngaithlatu tam dan leh sales data te chu tehna pawimawh a ni.
Taylor Swift hla hit, ‘The Fate Ophelia’ hian kar khat chhungin US stream maktaduai 23.4 neiin, radio airplay pawh ngaithlatu maktaduai 62.8 an tling a, sales 19,000 a la nei thei bawk a, hei hi a kar sarih nan chart-ah a No.1 pui leh ta a ni.
Billboard Hot 100 chart-ah hian Mariah Carey “All I Want for Christmas Is You’ chuan stream maktaduai 15.7 tlingin,, radio airplay pawh ngaithlatu maktaduai 9.7 a nei thei a, sales 1,000 a kai bawk a, No.8 a rawn kai thar leh ta. He hla hi kar hnih kalta khan Hot 100 chart-ah a rawn lang leh tan a, tun hi November thlaa chart top 10-a a lan vawi khatna a la ni a, tunhma zawng chuan December-ah bakh top 10-ah a lang ngai lo.
He hla hi 1994-a a tlangzarh tawh kha niin, December 2017 khan a vawi khat nan Billboard Hot 100 top 10-a a lang ve chauh a, December 2019-ah No.1 a kai ta a, hemi kum hian kar thum chhung a No.1 a. Heta tang hian kumtin December thlaah No.1 a kai ta ziah a, 2020-a kar hnih No.1-in, 2023-a pawh kar hnih No.1 lehin, nikum khan kar li a No.1 thung a, heti hian Hot 100 chart-ah kar 18 a No.1 tling tawh a, he chart-a kar 19 No.1 thei hla pahnih- Shaboozey ‘A Bar Song (Tipsy)’ leh Lil Nas X ‘Old Town Road; featuring Billy Ray Cyrus te chiah he chart-a No.1 nih ngunah a pha lo a, mahse, heng hla pahnih te hi kuminah lehpelin, record thar a siam ngeiin a rinawm.
‘All I Want for Christmas Is You’ hla avang hian record dang pawh a lo siam tawh a, 2019-a he hla a No.1 khan Mariah Carey hian Hot 100 chart-a No.1 ni thei hla 19 a nei tling chiah a, Solo artist zingah he chart-a No.1 kai thei hla ngah ber a ni a, overall record siamtu, The Beatles-in No.1 kai thei hla 20 neiin, Carey hian Beatles hi a umpha teuh viau a ni.
Chart No.1 hlui, KPop Demon Hunters soundtrack HUNTRIX ‘Golden’ chu No.2-ah bawk awm lehin, chart No.1 hlui tho Alex Warren ‘Ordinary’ pawh No.3-ah bawk a la awm a, Olivia Dean ‘Man I Need’ pawh No.4-ah la awmin, Swift ‘Opalite’ chu No.5-ah bawk a la awm.
Leon Thomas ‘Mutt’ chu No.7 atangin No.6-ah a insawn a, Justin Bieber ‘Daisies’ chu No.6 atangin No.7-ah a tawlh a, Kehlani ‘Folded’ chu No.8 atangin No.9-ah tawlhin, Morgan Wallen ‘I Got Better’ chu No.9 atangin No.10-a a tawlh ta bawk.