2080-ah tld 1.8/1.9 tlingin India-a mihring punna ding dawn

India-a mihring pung zel chu nau piang zat bi tlahniam zel avangin kum 2080-ah tluklehdingawn 1.8 emaw, 1.9 emaw tlingin a ding dawn nia chhut a ni aa, tunah hian mihring pakhat thi zelah mi 1.9 piang zel ang a ni.
India-ah hian kum 20 liam ta chhungin nau piang zat bi hi chak takin a tlahniam mek.
Indian Association for the Study of Population (IASP) General Secretary Anil Chandran-a chuan, “Kum 2000 khan nau piang zat bi – total fertility rate (TFR) chu 3.5 a ni thin a, tunah erawh chuan 1.9 a ni mek a. A tlahniam nasa hle a ni,” tiin PTI a hrilh.
India-a mihring cheng an tam lai berin kum 2080 vel niin tluklehdingawn 1.8 emaw, 1.9 emaw a ni dawn niin an chhut.
“Chhutna hrang hranga chhutin India-ah hian mihring tluklehdingawn hnih an tling thei danw lo,” tiin Chandran-a chuan a sawi.
Nau piang zat bi a hniam chhan lian ber chu hmasawnna leh zirna sang zel vang niin a sawi a. Hmeichhiaten lehkha an thiam sang zel a, pasal neih leh fa enkawlah thil thui tak hisap thiamin chu chuan chhungkaw tlem a hring ta niin a sawi.
Nau pai mai lo tura indanna hmanrua a awlsam a, birth control-na hrang hrang a tam tawh chu a ni te bawk tih Chandran-a chuan a sawi.
“Tunah chuan nupate hian tha an tih dan sawi dunin fa an neih zat tur pawh an chhut lawk thlap thlap zel tawh a ni,” a ti.
Miin kawppui an nei har tawh a, eibar zawnna huang a zau zel a, hei hian hmeichhiate hna tam tak siamin nau neih zung zung a tiharsa ta niin a sawi.
“Hmasawnna hian nau nei zat bi hi a nghawng thui hle a. Ziak leh chhiar thiam lo zingah pathum zel nei an nih laiin a thiam zingah chuan 1.5 leh 1.8 chauh a ni,” a ti.
West Bengal chu nau piang zat bi tlakhniam nasatna zinga mi a ni a. Sample Registration System Statistical Report 2023-ah kum 2013-a TFR chu 1.7 a nih laiin tunah chuan 1.3 a ni tawh a, 18% vela tlahniamin thi an awma thlaktu tur awm zel bi, 2.1 chu an pha lo hle.
West Bengal hi India ram chhunga nau piang zat bi hniamna ber niin Tamil Nadu nen an intluk tawk viau a, Delhi chu a chung hretah an awm.
Mihring pun zat bi chhuttute chuan nau piang an tlem hret hret laiin damdawia inenkawlnain hma a sawn zel avangin dam chen a rei zel bawk.
“Kum 60 pel an tam tawh a, hei hian upate enkawlna lama tan lai a ngai hle a, naupangte pawhin hemi lam hna hi an thawk zel dawn bawk,” tiin upate enkawlna hmun chu a pung zel dawn niin a sawi.
IASP hi kum 1971-a din niin chhuttu 1,100 rual an awm a. UNFPA, Population Council leh Population Foundation of India atangin puihna dawngin an thawkho thin bawk.