India-in Sri Lanka tui lennaa field hospital dinna tur thawn

India-in Sri Lanka tui lennaa field hospital dinna tur thawn
Cyvlone Ditwa avanga khuarel chhiatna lian tak tuar mek, Sri Lanka puih nan India chuan Thawhlehni khan Indian Air Force (IAF) thlawhna, C-17 transport aircraft hmangin para field hospital unit (damdawi in sak chawp) dinna tur hmanruate a thawn.
Agra atangin Colombo-ah thlawhna hi tirh a ni a, hetih lai hian sorkarin a thenawm ram puih hna athawh mekna, Operation Sagar Bandhu hnuaiah Indian Army pawhin integrated task force a dah bawk.
IAF Mi-17 helicopter-te pawhin humanitarian assistance & disaster relief (HADR) operation an thlak mek zel bawk a, tonne riata rit chhawmdawlna hmanrua phur thleng tawhin ram dang mi, damlo na zual leh nau pai laite telin mi 65 hmun himah an thiar chhuak tawh bawk tih IAF hotuin a sawi.
C-17 aircraft hmang hian Agra atangin hmanrua leh damdawi thiam 73 phurh niin Thawhlehni zan khan Colombo an thleng.
A hmain Indian Army chuan HADR contingent an tirhten Sri Lanka-ah hian hna an thawk mek tih X-ah an lo tar lang tawh bawk.
Cyclone Ditwah avang hian Sri Lanka-ah hian tui nasa taka lianin mi tam tak an thi a, thil a chhe nasa hle bawk a. India chuan Zirtawpni atang khan Operation Sagar Bandhu kalpuiin hmanhmawh takin chhanchhuah hna thawh a pui a, HADR (humanitarian assistance & disaster relief) a pe bawk tih ministry of external affairs (MEA) chuan Thawhtanni khan a sawi.
India hian thlawhna leh lawng hmangin chhawmdawlna hmanrua tonne 53-a rit a thawn tawh tih MEA chuan a sawi.
Thawhlehni khan Army chuan Operation Sagar Bandhu kalpui mekah hian mi 96 hmun himah an la chhuak tawh niin an sawi a, thenkhat chu damdawi ina dah nghal an ni tih X-ah an tar lang.
Cyclone-in Sri Lanka a nuai chiah khan Indian sorkar hian Sri Lankan thuneitute nen tang tlangin mamawh zualpui phuhrukna tur ei tur tonne 9.5 chu Indian Navy lawng pahnih – aircraft carrier INS Vikrant leh frigate INS Udyagiri hmangin Colombo-ah an dah nghal.
India hian Thawhtanni khan IAF thlawhna pathum hmangin chhawmdawlna hmanrua tonne 31.5-a rit chi hrang hrang – puan in, tarpaulin, puan lum, hygiene kit, ei tur ei nghal mai theih, damdawi leh inzaina hmanrua a thawn leh bawk.
Sri Lanka hi tui ian, lei min leh thil dang hrang hrang chhia a tuar mek a, district tam tak chu tlawhpawh theih lohvin an la awm.
November 16 atang khan khaw awm dan uchuak tak avanga chhiatna hrang hrang thlengah mi 390 thi awm tawhin mi 352 chin hriat lohvin an la awm mek bawk.