Sikreta chhiah punna tur dan pawm, a man to phah ring

Sikreta chhiah punna tur dan pawm, a man to phah ring
Indian parliament chuan Nilaini khan chhiah thar lak tur dan pawmin mi thiamte chuan khawvela mihring cheng tamna ber rama zial zu mi maktaduai 100 vel tan sikret man a pung dawn niin an sawi.
India-ah hian damlohna avanga inenkawlna atana sum sen hi vantlang insenna lian tak a tling a, sorkar chuan sikret hlauhawmna leh that lohna tar dan tur thar bakah a zu miten an zuk tlem theihna turin chhiah tam zawk lakna tur dan hi a pawm a ni.
“Mawlmang taka sawi chuan sikret hi mi tin banphaka a awm loh hi kan duh a ni,” tiin Finance Minister Nirmala Sitharaman-i’n dan thar tur pawmpui tura rorelna ina a pharhnaah a sawi.
India-ah hian sikreta chhiah lak hi retail price atanga 53% a ni a, World Health Organization (WHO)-in zu an tlem theih nana 75% aia tlem lo la tura a rawtna aiin a tlem zawk tih a sawi.
Dan thar tura pawm tak, Central Excise (Amendment) Bill, 2025 hian sikreta chhiah tam zawk lak bakah nawmchenna thil (luxury item)-ah pawh chhiah a tipung dawn.
Tuna sikreta chhiah lakah hian goods & services tax (GST) leh chhiah dang 28% a tel a. Bill tharah hi chuan sikret tlawn 1,000 zel Rs. 2,700 leh Rs. 11,000 man inkarah chuan GST dang 40% lak belh tur a ni dawn a ni.
India-a sikret siamtu lian – ITC, Godfrey Phillips India leh a dangte chuan an thil siama chhiah sang zawk lak tur chungchangah hian engmah sawi an la nei lo.
Sitharaman-i hian chhiah lak zat tur tihpun hian eng ang takin nge a man a nghawng dawn a sawi chiah lo va. Mi thiamte erawh chuan dan tharah chhiah a san chuan company-te pawhin a man an tihsan ve nghal ngei a rinawm niin an sawi.
“Chhiah lak tura rawtna awm hi tuna lak mek aiin a tlangpuiin 25% atanga 40% inkara tam zawk a ni,” tiin EY India-a mi thiam, Bipin Sapra chuan a sawi.
WHO-in a chhinchhiah dan chuan vaihlo leh a kaihhnawih ei leh zuk hi India-a thihna leh natna thlentu langsar ber a ni a. Kum tin mi maktaduai 1.35 dawnin an thih phah ziah a ni.