Chhattisgarh-a Maoist 12 that, police pathum thi tel

Chhattisgarh-a Maoist 12 that, police pathum thi tel
Tun hnaia Chhattisgarh-a Maoist laka beihpui thlakna lian berah Bijapur leh Dantewada district ramri, West Bastar Division-a ram ngaw chhunga inbeihnaah hel pawl mi 12 kah hlum an ni a, venhim hna thawktu pathum an thi bawk.
Nilaini zing khaw var hma atanga venghim hna thawktuten Maoist tamna hmuna beihpui an thlakah hian zan thlengin ruang 12 an hmu tawh a ni.
Chhattisgarh Chief Minister Vishnu Deo Sai-a chuan, “Vawiin hian kan sipai huaisenten Naxal beihpui an thlak mekah Bijapur district-ah mi 12 an that a. A bul vel zawn leh dap hna an thawk chhunzawm zel a, he beihpui thlaknaah hian DRG Bijapur Head Constable Monu Waddi, Constable Dukaru Gonde leh Constable Ramesh Sodi te chuan an nun an hlan bawk a, huaisen taka an thawhna hi ka zah em em a ni,” a ti.
Bijapur SP Dr Jitendra Yadav-a chuan DRG Bijapur-Dantewada, STF, CRPF leh CoBRA team tangrualten Naxal beihpui hi thlakin zing dar 9:00 vel atangin silai a ri tan tih a sawi a. Darkar eng emaw zat chhung an inbei niin a sawi bawk.
Bastar Range IG Sundarraj P chuan inkahna hmunah hian SLR rifle, INSAS rifle leh .303 rifle bakah ralthuam leh puak thei dang an hmu nual niin a sawi a. Hel thite hi tute nge an nih erawh sawi theih a la awm lo thung.
Bijapur-a DRG police pathum thite bakah hian mi dang pahnihin hliam an tuar bawk a; mahse, rang taka enkawl nghal an nih avangin an dinhmun hlauhthawnawm an ni hlawm lo nia sawi a ni.
SP Dr Yadav chuan beihpui thlak chhunzawm zel a nih thu a awi a. “Sipai pawh intirh belh a ni a, heng lai vel zawng zawng hi luh leh chhuah theih lohva dan a ni,” a ti.