Israel-in Rafah crossing hawn a tum hnai

Israel-in Rafah crossing hawn a tum hnai
Israel chuan Palestinian-ten Gaza Strip an chhuahsan theih nan Gaza leh Egypt inkalpawhna pawimawh, Rafah crossing chu an hawng thuai dawn tih an sawi.
Israeli military body Cogat chuan chhuahsan hi ‘Egypt nena indawrin, Israel leh European Union mission-in venhimna thila a pawm hnuah’ phal a ni dawn tih an sawi a. Hetianga hawn hi inkahhai puan hmasak zawk, January-a an kalpui dan ang kha a ni tih an sawi bawk.
Israeli venhimnaa hotu lian chuan an thil tum chu chawlhkar sarih kal taa Hamas nena inkahhai an kalpui mek chu Israel-in a thlawpzia tihlanna a nih thu a sawi.
Hetih lai hian Egypt chuan Rafah crossing hawn turah hian Israel nen indawrna a awm loh thu an sawi ve thung.
State Information Service-in Egyptian hotu lian sawi an sawi chhawnah ‘ramri kanna hi hawng tura kan inrem a nih chuan US President Donald Trump-a rawtna angin Gaza Strip atanga chhuah leh luh a theih vek tur a ni’ tih a ni thung.
Trump-an Gaza-a muanna a awmna tura rawtna point 20 a siamah khan January inkahhai pawma mi ang khan ‘Rafah crossing chu a hmaa angin luh chhuah theiha hawn tur a ni’ tih a ni.
Crossing hi May, 2024 atang khan khar a ni deuh ngar ngar a. A hma khan Palestinian-te chu indo lai pawhin chhuah phalsak an ni a, puihna phurh luhna atana hman ber a ni bawk.
World Health Organization (WHO) chuan Palestinian 16,500 vel na tak leh hliam, ram pawna enkawl ngaiten chhuah theih hun hi an nghal mek niin a tar lang a. Inkahhai kalpui a nih atang khan damlo 235,a tam zawk naupangte chauh ram danga enkawl tur hian lak chhuah an la ni.
Israel-a Haaretz chanchinbu chuan Palestinian Authority (PA) sipaite pawhin EU hnuaia Border Assistance Mission nen Rafah crossing hawnah hian an pui dawn niin an tar lang.
Haaretz hian Israeli Prime Minister Benjamin Netanyahu-a’n Hamas-in an mi hren thite ruang an kir mai loh avangin a kar nan Rafah crossing hi hawn a duh lo niin an tar lang bawk.
Inkahhai kalpui mek thawh khatna, October 10 atanga tanah hian Hamas hian Israeli an hren dam lai 20 an chhuah bakah thi tawh ruang 28 chu darkar 72 chhunga hlan tura tih an ni.
Dam laite hi October 13-ah an chhuah tawh a, lehlamin Palestinian lung in tang 250 leh an mi hren 1,718 an chhuah.
Israeli hren ruang 23 an hlan tawh a, ram dang mi pathum an hlan tawh bawk a. Israel-in indonaa thi Palstinian ruang 345 an hlan tawh bawk.
Gaza indona hi Hamas-in October 7, 2023-a Israel chhim lam beia mi 1,200 chuang an thah leh hren tura mi 251 an hruai atanga intan a ni a. Israel-in sipai chakna hmanga Gaza bei nghalin mi 70,100 chuang an thi a ni.