Hmeichhe harsa zawkte tan a thlawna neih theih LPG connection hawng leh
Hmeichhe harsa zawkte tan a thlawna
neih theih LPG connection hawng leh
Khawsak harsa zual hmeichhe kumtling chin, eirawngbawlna gas connection la nei lo tana sawrkar laipuiin ruahmanna a siam – Pradhan Mantri Ujjwala Yojana (PMUY) chu dil leh theih a ni a, a dil hmasa sa tana pek tur a nih avangin Mizoram atanga a dil thei chin chuan dil thuai turin Indian Oil Corporation Ltd chuan mipui an hriattir.
Khawsak harsa, thla khata cheng sing khat chuang la tling lo, gas connection la nei lo, chhungkuaa hmeichhia kum tling awm tan PMUY hnuaiah a thlawna pek turin gas connection hi a dil theih a. Chutihrualin, India mi leh sa dik tak an ni ngei a ni tih fiahna atan leh hmeichhia kum tling ngei an ni tih leh, chhungkaw khata chengho an ni tih finfiahna atan Aadhaar number, chenna hmun tihchianna, ration card emaw a tlukpui dang, KYC dilna form, bank account leh tul dang kengin an huamchhung LPG distributor hnenah emaw pmuy.gov.in emaw anmahni hnaiha awm common service centre-ah dil theih a ni tih IOC Ltd hotute chuan a sawi.
IOC deputy general manager Z Lhungdim sawi danin, kum 2016-a PMUY bul tan a nih atang khan Mizoramah hemi hnuaia gas connection nei tawh hi 36031 an awm. A district ang zawngin Aizawl-ah 6618, Saitual 1265, Champhai 2187, Serchhip 1891, Khawzawl 1051, Lunglei 4358, Hnahthial 1865, Kolasib 4564, Lawngtlai 3850, Mamit 7462 leh Siaha 1000 an awm tih a sawi a ni.
“PMUY tum ber chu, mahni ina LPG connection la nei lo chhungkuaa hmeichhiaten mahni inchhungah ngei hahdam, awlsam leh thianghlim zawka eirawng an bawl theihna tur kha a ni a. A dil turin hmeichhe kumtling ngei kher erawh a ngai,” a ti.
Zawhna chhangin IOCL hotu chuan, gas connection pakhat bak hi tih theih a ni loa, subsidy hi Rs.444 an hmu thei a, bur dang an lak belh chuan subsidy a awm thei tawh lo thung tih a sawi.
FCS&CA secretary Vanlalhruaii chuan PMUY dil hi a chuh chak chak a nih hmel a, Mizoram pawhin kan chuh chak chuan kan inkhung len vek theih a beiseiawm, tiin, district tinah bawrhsap kaihhruaiin Committee dinin sawrkarin hma a la tih a sawi a. A bikin Mamit district velah dil thei an la awm nual an ring tih a sawi a ni.
IOCL hotute sawi danin, PMUY hnuaiah hian India ram pumah LPG connection vaibelchhe 10.33 tih a ni tawh a, tun tumah hian nuai 25 hawn belh a ni.