Lirthei document fel lo zingah sawrkar mi lirthei a tam ve tho – CESJ
Lirthei document fel lo zingah
sawrkar mi lirthei a tam ve tho
– CESJ
Lirthei document fel lo zingah sawrkar mi leh sawrkar lirthei a tam ve tho avangin document fel nei ve turin an phut tih Centre for Environment & Social Justice chuan an sawi.
Centre for Environment & Social Justice (CESJ) thuchhuak chuan, lirthei khuahkhirhna dan kenkawh kawnga sawrkarin kum engemawzat a kalpui tawh, Zero Tolerance Drive chu kuminah December 1 atangin a kalpui a, Aizawl khawpui chhung lirthei chi hrang hrang tawt thin tak chu a thawl phah hle a; hei hian Mizo ze dik tak, dan bawhchhiat leh pehhel tumna chiang takin a langah an ngai a, chhuichian ngei ngaiin an hria tih sawiin, ‘He thil hi politics-a lak chi a ni loa, hnam anga kan bawhchhiatna leh kan insiamthatna tura chi a ni zawk. Mimal lirthei neite lirthei dan leh hrai zawm turin kan inngen a, sawrkar pawh inenfiah turin kan beisei a ni,’ a ti.
Lirthei kan nei duha kan nei thei a nih chuan, lirthei chhiah kan chawi ngei tur a ni tih chu an ngaihdan a ni, tiin, lirthei neitu dan zawm tur zawm lote, zahngaihna awm loa enfiah huna lirthei bibo /vak chhuak ngam lo nih chu thil zahthlak a n tih a sawi a ni.
Zero/No Tolerance vanga mimal lirthei neitute phunnawina a tam avangin, mipui phunnawina zawnah zirchiangin December 5 khan sawkar hnathawk lirthei kawl 37 an ‘vahan’ a; an ‘vahan’ zingah lirthei 35 document a fel lo tih CESJ hian sawiin, ‘’Insurance nung a awm loa, PUCC (pollution under control certificate) nung lo a awm nual bawk. Heng document fel lo zingah hian dan siamtu pawl zing ami MLA pahnih, Aizawl mayor leh thawktu dang lirthei pathum, police hotu lian lirthei pahnih leh Traffic Police lirthei ke hnih leh ke li nei an tam ber,’ a ti.
2022 October 11 khan Supreme Court of India thupek bawhzuiin Mizoram sawrkar chuan sawrkar lirthei zawng zawng, third party risk-a insurance ti vek tura office memorandum a tihchhuah chu sawrkar lirthei kawltuten an zawm lo hle tih a sawi a. ‘Mipui laka inluling a, mipui lirthei endik thei an ni em, tih hi zawhna awm thei a ni a, hei hi ram inrelbawlnaa mipui leh sawrkar inkar tizautu thil pawi tak a ni. Sawrkar lirtheite hian boruak chhia an siam /pek chhuah ve tho thin avangin pollution certificate (PUCC) nei ve turin kan phut a ni,’ a ti.