Health care atan cheng nuai 8400 chuang pe chhuak tawh

Health care atan cheng nuai 8400 chuang pe chhuak tawh
Mizoram sawrkarin cashless-a health care bill a pek hnu ah he scheme zawmtu damdawi in ho hnenah cheng nuai 8400 chuang a pe chhuak tawh.
ZPM Media chairman, minister B Lalchhanzova chuan thuthar thehdarhtute hnenah ZPM kaihhruai sawrkar hnua department hrang hrang ho hnathawh, hmalakna ho a sawi a. Hmabak thahnem tak a la awm tih hriatpui a, sawrkar tih theih chinah ram tana tha ber pawchhuakin, hmalam an pan zel tih lo hriatpui turin mipui a ngen tih a sawi a ni.
Health & Family Welfare department hnuaiah Mizoram Universal Health Care Scheme kalpui tan, kumin April atanga November 28 thleng khan damlo mi 54261 inenkawlna cheng nuai 8405 an pe chhuak tawh a. Kuangfung hrang hrang atangin Civil Hospital, ZMC&H, Cancer Hospital, Kulikawn Hospital, District Hospital leh damdawi in dang hrang hrang tihchangtlun a nih bakah quarters thawmthat mek zel a ni tih a sawi.
Social Welfare department-ah ruang phurhna atan September 2024 atanga July 2025 thlengin ruang 962 phurhna atan cheng nuai 95.72 sen a ni tawh tih a sawi a. Ruihhlo ngaite chhanchhuahna – Hulhliap Short Stay Centre atangin batch 6 an chhuak tawh a, mi 1200 vel enkawl tawh niin, batch tinah cheng nuai 30 vel zel sen a ni tih a sawi. Rualbanlote tan State Fund atangin nuai 38 dah a nih bakah kum upate pension atan central scheme leh State Fund atangin mi pakhatah Rs. 1000 pek belh an ni tih a sawi bawk.
Agriculture department-ah hmarcha chu FPC/FPO ten ram chhung leh pawnah an hralh zo vek tawh a. NMEO-Oil Palm hnuaiah Kolasib, Mamit, Lawngtlai leh Serchhip district-a oil palm chingtute hnen atangin sawrkar thawhpui Godrej Agrovet Ltd. leh Patanjali Foods Ltd. chuan oil palm rah metric tonne 5955.66 cheng nuai 724.96 man leisak an ni a. Kum 2023- 2024 khan oil palm chingtu mi 1184-in cheng nuai 1576.12 man an lei chhuak tih a sawi a ni.
ZPM Media chairman chuan, an flagship program – Bana Kaih thlai thar lei hnuaiah Mizoram Agriculture Marketing Board kaltlangin sawhthing quintal 33835.82 lei niin, hemi atana sawrkar sum sen zat chu vbch. 137.72 a ni tih a sawi. Hmunphiah chu empanelled buyer, non empanelled buyer leh ZOHANDCO (nuai 199.89 seng) kaltlanga lei zat chu quintal 48602.29 a ni tih a sawi. Buhhum quintal 1473 leiin, nuai 44.184 sen a ni tih a sawi a ni.
Bana Kaih loan atan phase-I ah mi 702 dilna pawm niin, CM Special Package atan phase-I ah mi 2258 thlan an a ni tih a sawi bawk.
Tourism department-ah policy siam, system thlak leh infrastructure lama hmalakna hrang hrang avangin ‘tourist footfall’ a pung nasa a, kum 2024- 2025 chhungin mi 524784 in Mizoram an tlawh a, a punna hi 138.5% niin, heng tourist-ten Mizorama sum an rawn thehthang chu cheng vaibelchhe 3800 a tling tih a sawi a ni.