Hachhek tlang dung khuate’n kuhva hlawhtlinpui

A hma chuan Hachhek tlang dung hi serthlum nen inhmeh riauva hriat an ni thin a, tunah chuan an khaw hming han sawiin rilruah kuhva a lang tawh. Kuhva an hlawhtlinpui a, eibar lama an innghahna, an hnapui a ni.
Hachhek Bial Kuhva Chingtu Pawl (HBKCP) chuan kumina kuhva man atanga sum lut hi cheng nuai 5087 chuang tiin an chhut.
Kuminah kuhva hi bak khat Rs 2500-in an hralh a, bag 203480 an hralh. Bag heti zat hi ton 10174 a ni a, cheng nuai 5087 vel man a ni.
Kumin hi sum an lakluh tam ber kum a ni lo a, an hralh hnem ber kum pawh a ni lo. 2023-ah khan bag 494615 an hralh a, khang lai khan bag khat Rs 1300 man a ni. Chumi kuma an sum hmuh chu cheng nuai 6430 a ni.
A hma chuan serthlum an uar a, kum sangbi liam ta tawp lam khan serthlum hi a tam. Serthlum chu kuhva-in an thlak ta a ni.
A ti hmasa chu Zamuang khua an ni a, khaw dangin an ti ve ta zel. Khaw 12 chuangin tunah chuan an ching a, khaw 12 velah hi chuan chhungkaw tam zawkin kuhva hi an nei ang.
An sawi danin, kuhva hi kum thum velah chuan a rah mai a, mahse kum ruk kum sarih velah a vanglai a thleng. Kum tawp lam, ‘ber’ thlaah a rah an lo tan a, kum thar February velah chuan an hralh zo tawh. Assam atangin ‘mazon’-in an lei thin a, a kung/hmun an khar thin, a man pawh a tirah an inpe nghal thin a, tunah pawh hian nakkum February vela mi tur pawh a man an hmu tawh turah ngaih a ni.
2000 hnu lamah tih tak takin kuhva hmun an siam a, an uar deuh deuh bawk. NLUP hlawhtlinpuituah pawh an inngai a, NLUP tihmingthatu tia sawi thamah an inngai.
Kuhva hralh zat leh
sum hmuh zat
Kum Ton Rs
(a nuai biin)
2019 4877 1756.5+
2020 4322 1902+
2021 6230 2741+
2022 12008 4323+
2023 24730 6430+
2024 13461 3500+
2025 10174 5087+