PM-in a tlawh tur hmuna ammonia plant kang

PM-in a tlawh tur hmuna ammonia plant kang
Assam-a Namrup-ah Pathianni zan khan ammonia plant, Brahmaputra Valley Fertilizer Corporation Limited (BVFCL) a kang vak a, helai hmun hi chawlhkar hnih lo awm leh tura Prime Minister Narendra Modi-a’n an state a tlawh huna a kalna tur zinga mi a ni.
Kangmei hi zan dar 07.10 vela ammonia plant-a pressure air compressor atanga chhuak tan a ni a, van lamah a kang alh chho nasain a khu nasa hle bawk.
Pressure air compressor-te hi lei tihthatna siamnaa hmuna peng pawimawh ber pakhat a ni a, ammonia gas tidaitu leh a bawlhlo inpawlhna tura pawimawh a ni.
Kang thelhna hmanrua tam tak hmanga thelh tuma beih nghal a ni a, rang taka kang thelhtute an chet chhuah avangin thelh mih leh thuai a ni a. Namrup Police Station Officer-in-Charge Mintu Boro-a chuan mihring thi leh hliam an awm lo tih a sawi bawk.
Kum 2020 khan he hmunah veng hian thil puak a lo awm tawh a, Unit II-a pre-heated furnance kaltlanga high-pressure ammonia synthesis gas compressor atanga ammonia reactor-a pekna pipeline chu na takin a lo puak tawh a ni.
Thuneitute chuan he thil thlen chhan hi a khawl hlui tawh lutuk vangah an puh a. A nihd an pangngaiah chemical plant-a khawlte hi kum 20 vel bawr daiha siam a nih laiin Namrup-a mi hi chu kum 45 chuang a ni tawh.
Pathianni zana thil thleng hian BVFCL hmunhmaah hian himna dan zam zawm a ni em tih zawhna pawh a siam thar nghal a. Plant hi prime minister-in a tlawh huna lei tha siamna tur hmun dinna tur lung a phumna hmun atanga metre 1,000 chauhva awm a ni.
Modi-a hian December 21-ah Namrup hi a tlawh dawn a, Assam Valley Fertilizers & Chemical Company Limited (AVFCL) hnuaiah ammonia-urea fertilizer project thar dinna tur lung a phum dawn a ni.
AVFCL hi July 25, 2025-a din kha niin an state leh an thenawm vela lo neihna tihchakna tura thawhhona hnuaia din a ni a. Assam sorkarin neitu nihna 40 changin a bak chu National Fertilizers Limited, Oil India Limited, Hindustan Urvarak & Rasayan Limited (HURL) leh BVFCL ten an insem ve thung.
Ammonia-Urea complex thar dina thil a siam chhuah theih hunah chuan kum tin metric tonne nuai 12.7 siam chhuak thei tura beisei a ni.