Viksit Mizoram 2047

India ramin zalenna a hmuh champha kum 100-na 2047-ah chuan ‘India ram hi ram changkang/hmasawn (developed country)-ah a inhlangkai hman tur a ni, tiin Prime Minister Modi chuan kum 2023 December khan ‘Viksit Bharat 2047’ a puang a. He hmathlir hlawhtling tur chuan state tinte hmalakna a pawimawh dawn avangin PM Modi-a pawhin, “Sabka Prayas” (Collective Effort/Everyone’s Effort) tiin a lo sawi tawh a ni.
Hemi dungthul hian, Mizoram hian eng tin nge hma kan lak ve dawn tih zirhona “Transformed Mizoram Vision 2047 Roadmap Workshop” chu nimin khan neih a ni a; department hrang hrang hmalak dan turte thlir ho a ni a.
Department hrang hrang hmalakna theuh infawkkhawm hi, 2047-a ‘Developed Mizoram’ nih theihna tur khawp a tling dawn em tih chu kan thlir tur ber a lo ni ve ta a; kum 22 tha hun kan la nei a ni.
Pawimawh a tam dawn hle; chung zinga a pawimawh hmasa ber tur nia lang ta chu, hmasawnna thlentirtu a mihringa te ber chher hriam (human resources development) hi a nih a rinawm; a chhan chu economic growth siamtu ber chu mihring a ni a; ram economy san zawng tehfung pakhat ‘per capita income’ siamtu ber a ni tlat a ni. Khawvel ram changkang tehfungah pawh hian, ‘human development index’ hi a hmatawngah a awm vung a nih hi. Department hrang hrangin ruahmanna an siam zawng zawng tihlawhtlingtu tur a mihringa te ber hi kan inchher hriam a pawimawh dawn hle tih a lo lang a ni.
Chumi atana pawimawh hmasa pakhat chu ‘education & skills’ hi a ni awm e. Tunhma atanga ‘quality education’ lo buaipui tawh kan nih dan kan hre vek a, kum tam tak a liam tawh hnuah pawh ‘quality education kan mamawh’ tih a la ni reng a, ‘world class education’ sawi rikna pawh a rei leh tawh, kan la world class lem lo chu niin a lang si.
Skill development lamah pawh hmalakna tha tak a awm chho mek a, tunhma ngaihtuah chuan hma pawh kan sawn viau. Tuna kan mamawh lian tak pakhat chu, vocational training hi a ni bawk awm e. Formal education kawng zawh tluan thei lo tan hian vocational training hi a pawimawh em em; hei hi uar zawka kan kalpui a ngai niin a lang.
Economic reforms nei turin entrepeneurship a pawimawh tih kan ram hruaitute hian an hria, ease business regulations te pawh an buaipui ve tan. Infrastructure growth lamah ‘kawngpui’… sawi zawm lo mai ang. Healthcare lamah hmasawnna a awm zel, hmabak lah a la ko. Kum 22 chhung hian kan ‘developed’ ve hman ang em?