Arsenal kawng dal thei an awm lo

December 10, Nilaini zan khan UEFA Champions League, League phase khelh chhunzawm a ni a, season kal meka la chak vek Arsenal chuan Mimualah 3-0 in hnehna an chang nawn leh. Saipui kal taka Arsenal an kal ngauh ngauh laiin Newcastle United erawhin hnehna an chang zo lova, tum angin table-ah hma an sawn thei rih lo.
Gunners tan Madueke a inlar
English Premier League leh Champions League-a hmahruai mektu Arsenal hi Belgian club lian Club Brugge hmachhawn turin Jan Breydel Stadium ah an leng lut. Mikhual an nihna hmunah an that dan ang berin an inlan thei lova, an tlarhnung an phuahchawp a ni deuh ber. Hliam vanga William Saliba, Gabriel leh Cristhian Mosquera te an chhawr theih loh vangin side back Jurrien Timber chu a laiah a khelh a ngai a. Defensive midfielder Christioan Norgaard chu centre-back-ah an chhawr a ngai bawk. Tlarhnung phuahchawp deuh mah se midfield-ah erawh an ziaawm viau. Decland Rice chhawr thei lo mah se tlarhmaa an dah fo Mikel Merino an pawt let a, Martin Odegaard leh Martin Zubimendi te nen an inkawp. Tlarhmaah Trossard a inhliam vangin Gabriel Martinelli-an bul a tan a, Saka aiin Noni Madueke a lut hmasa zawk. Saka aia bul tan Madueke hi a vul a, goal hnih a thun ta hial a ni.
Mikhual an nihna hmunah Arsenal an huangtau a, mualneitu an nawr na hle. Captain Martin Odegaard-an hlauhawm a siam hnu lawkah Lewis Skelly chuan goal post a pet per bawk. Him hram thin mah se Club Brugge an him rei thei lo. |ha zeta a khalh tlang hnuin Noni Madueke chuan top corner-ah pui zetin a pet goal a, minute 25-naah hmahruaina goa a thun. Champion League-a Noni Madueke goal thun hmasak ber hi UCL a goal ropui zingah chhiar tel a nih ngei a rinawm.
Goal an thun vangin Gunners an phur a, Corner atangin goal an thun belh zui teuh hle a, goal chhuah belh em lovin Club Brugge an him thei hram. An beh reng hnuin chawlhlawk dawn hnaihah mualneitu team game a kang a, goal thun ngei tumin tan an khawh. Belgian club hian hlauhawm siam zawn bawk mah se David Raya chuan save a nei zawn a, an team a chhanhim.
Chawlhlawk hnu lamah Arsenal an khel tha chhunzawm a, goal an thun belh leh thuai. Martin Zubimendi cross tha zet mai chu Noni Madueke chuan hnaite atangin awlsam zetin a tauh goal a, minute 47-naah an goal hnihna a thun. Mimualah si hniha hma an hruai vangin Gunners hi an inringtawk viau tawh a, point thum hmu ngei turah an inngai. Si hnih faiin hmahruai tawh mah se an inthlahdah mai lova, goal an thun belh leh thuai. Minute 56-na lekah Gabriel Martinelli chuan pui zetin a pet goal leh ta mai a, an goal thumna a thunin an hmahruaina a tizau.
Martinelli goal thun hnu hian inkhel a hmuhnawm chhunzawm viau a, goal thun tum viau mah se Club Brugge an hlawhtling zo ta lo thung. Hun tawp thlengin goal a luh belh thei a lova, Arsenal chuan mikhual an nihna hmunah 3-0 ngawtin hnehna an chang a, point thum dang an hmuh belh.
Club Brugge lakah an chak leh tak vangin Arsenal kawng dal thei an awm lova, vawi ruk khel tawhin an la chak fai vek. Gunners hian khelh ruk atanga point hmuh theih zawng zawng point 18 hmu vekin table chung ber an luah nghet a, an hnuai chiaha awm Bayern Munich nen point thumin an inthlau mek. Bayern hi Gunners hian an hneh tawh nghe nghe a nih kha. Vawi ruk chak zawn tawh Arsenal hi last 16 lut chiang tluk an ni hial tawh. Hetihlai hian Belgian club Club Brugge hian khelh 6 atanga point li 4 hmuin 34-na an luah ve thung.
Newcastle an chak zo lo
Arsenal in nuamsa pangngai taka hnehna an chan laiin English club dang Newcastle United erawh chuan uiawm takin hnena an chang zo lova, Bayer Leverkusen nen 2-2 in an inhnehtawk a, uiawm takin point hnih an hloh.
BayArena a lenglut Newcastle hian bul an tan tha lova, an lama an tih goal hmangin goal an chhuah hmasa. Bruno Guimarães chuan inkhel tan atanga minute 13-na lekah an lamah a ti-goal a, German team hmahruaina goal a thunsak. He goal hmang hian Leverkusen in 1-0 a hmahruai chungin chawlhlawk an hmang.
Chawlhlawk hnu lamah Newcastle an khel tha ve thung a, goal hnih an thun. Magpies tan hian Anthony Gordon chuan minute 51-naah penalty pet goal in an si phurh a sut. 1-1 a nih hnuin inkhel a hmuhnawm zui viau a, Newcastle an che fuh nawn leh. Lewis Miley chuan minute 74-naah hma an hruai letna goal a thun. Hmahruai let bawk mah se an goal an venghim rei thei bik lova, Alejandro Grimaldo chuan minute 88-naah an si phurh a sut a, 2-2 in an inhneh zui ta a ni.
Newcastle hian khelh 6 atanga point 10 hmuin 12-na an luah mek a, Bayern Leverkusen hian 20-na an luah mek ve thung.