Synod-in Jordan Centre lak a remti

Mizoram sawrkarin a hluihlawn titih tawh, ruihhlo ngaite enkawlna atana din Jordan Centre Sethawn chu Mizoram Synod-in enkawl zui tura lak a remti. MNF sawrkar laia tharthawh Jordan Centre Sethawn hi ruihhlo ngaite enkawlna hmun liantham taka buatsaih an tum thu hetihlaia chief minister Zoramthanga chuan a lo sawi tawh a. Hetihlai hian a zuzi zui ta a ni. Nikum June khan chief minister Lalduhoma hoa Council of Minister thukhawm chuan midang kuta hlan chhawn nise, an ti.
Chief minister hian ruihhlo ngai enkawlna atan Jordan Centre Sethawn chu sawrkarin kalpui thar a, thiamthil an zir nghalna hmuna siam turin Social Welfare department a hrilh tih kumin May-a kohhran hrang hrang nen an inkawmnaah a lo sawi tawh bawk.
Hemi hnu hian sawrkar chuan Jordan Centre enkawl thei tur hi kawng hrang hrangin zawn a ni a, a; kumin June khan Social Welfare Department chuan Jordan Center enkawl chungchangah hian Mizoram Synod pawh hi a lo dawr tawh a ni. Rorelnaa thial a nih hnu ah kumin Synod Inkhawmpui vawi 102-na chuan he Centre enkawl tura lak hi remtiin, ‘Jordan Centre, Sethawn lak chungchang (SEC 314:41) chu tha tih a ni a, thil tul chu Synod Executive Committee bawhzui atana tih a ni,’ a ti.
Tuna Jordan Centre ram luah lai leh a hnua zauh belhna atana a thut chin hi hectare 7 vel nia sawi a ni.
Synod Inkhawmpui vawi 102-na hian damdawi in tihchangtlunna leh zirna lama hmasawnna tur pawh a rel a. Synod Hospital-a lung lam enkawlna changtlung zawk a awm theihnana hma lak rawtna chu Cath Lab neih dan kawng zawn nen la kawpin tha tih a ni a. SEC bawhzui tura tih a ni. Synod Hospital dinhmun enthat rawtna pawh tha tih niin, Hospital Board-in hma lo la chhunzawm se, an ti.
Mizoram Christian College-a D.El.Ed leh B.Ed zirna hawn rawtna chu SEC-in a tul anga hma a lak tura tih a ni bawk.
2024- 2025 Synod Statistics-ah Presbytery 48 a awm a; Pastor bial 310 awmin, (tualchhung) kohhran 1185 a awm a; kohhran member 646891 (mipa 312153 leh hmeichhia 334738) an awm a ni.
Synod Inkhawmpui thurel dang:
8 Inkhawm ngaihpawimawh inzirtir rawtna chu hma lak tha tih a ni a, SEC bawhzui tura tih a ni.
8 Pathian thu chhiarna atan Bible hman tam inzirtir rawtna chu tha tih a ni a, kohhran tinah hriattirna chhuah nise, tih a ni.
8 Mizoram-a Chanchintha thlen ni hman dan chu tun aia urhsun leh nasa zawka hman tha tih a ni a, SEC bawhzui tura dah a ni.
8 ‘Hnathawh uar tur leh taima tura inzirtir’ chungchanga thu lut chu Synod Social Front Committee-in tualchhung kohhrante hmalak dan tur ruahmanna rawn siam se, tih a ni.
8 Mizoram tlawhpawhna kawng inhawng zau zel chungchanga inzirtir rawtna chu hma lak mekna a ni a, zirchianna pawh neih tawh niin, chak zawka umzui nise, tih a ni.
8 Kohhran Pavalai Pawl fellowship puitlinga hlankai rawtna chu tha tih a ni a. A dinhmun tur leh kalphung tur SEC-in ruahman se, Synod-ah thlen leh rawh se, tih a ni.
8 Khawvel ramdanga Presbyterian Kohhran kan mi leh sa awmte ngaihsak dan kawng zawn leh, India ram pawna Mizote enkawltu dah chungchang chu sawikawpin, India ram pawna Mizo awmte ngaihsak dan kawng zawn chu tha tih a ni a. SEC-in Synod-a ngaihtuah leh turin ruahmanna siam se, tih a ni.