IAS tlin theih loh chhan….

Mizoram Youth Commission chairman chuan tunhnai khan Mizoram atanga IAS inziak tling an awm theih loh chhan sawiin, IAS tlin tuma beitute mawh ni bera a ngaih thu a sawi a.
MYC chairman-in hetianga a sawi chhan nia lang ta chu— Kum 2021 atangin Super IAS programme kalpui a ni a, Mizoram sawrkarin IAS aspirant-te zirna senso (coaching fee plus etc.) a tumsak a, chumi atan chuan cheng nuai zahnih chuang senral a ni tawh a. Sawrkar chuan a tihtur ang chu a ti thawkhawt tawh a, a bak chu IAS nih tuma beitute mawh a ni ve tawh e, a tihna tluk a ni awm e.
IAS Super programme kalpui a nih atangin kum li dawn chu a vei ve ta a, kum 10 chuang All India Services-a inziak tling thei kan awm tawh loh dan atanga chhut chuan, hmalakna tharlam atanga hun rei lo te chhunga a hlawhtlinna hmuh nghal zut zut chu beisei theih leh beisei ngam chi pawh niin a lang awm lo ve; kan quality chhutin.
Mahse, ‘mahse’ tihna tur thil pakhat a awm a, chu chu — kan thenawm state Manipur nena inkhaikhinna tur thil remchang deuh mai a awm vang a ni. Manipur pawh hian Super IAS programme hi kum 2021 atang khan a kalpui tan ve tho a, senso atan cheng nuai 280 an dah hrang nghal thlap bawk. Kan hriat angin, UPSC hnuaia Civil Services Examination 2023-ah khan Manipur atangin mi 10 zet an inziak tling a, kan tlangmipuite pawh pali an tel nghe nghe a nih kha. Super IAS programme an kalpui hma pawhin Manipur hi chuan, All India Services-a inziak tling tawk hi chu a nei deuh reng hrim hrim a ni.
‘Nih tumte mawh’ tia bukna kan khai lai hian, a phen (behind the scene)-ah hian eng nge awm thei tih hi kan ngaihtuah tel a pawimawh hle awm e. Education leh a kaihhnawih heng – facilities&amenities lamah kan hniam han ti dawn ila, kan mi hmasate hunah hlei hlei khan education dinhmun kha a hniam a, chuti chung chuan All India Services-a inziak tling an awm deuh reng tho si. Chuti a nih chuan ‘nih tuma te mawh’ liau liau chu a ni ber alawm a tih theih awm e. Chutih ruala kan hriat reng tur chu, zirna kan kalpui dan pawh hi enfiah a, ennawn a, siksawi a, siam that a ngai, tih hi a ni. Dawhkana lehkhabu leh pen kan inchhawpsak tawrh piah lam hi kan inenfiahna tur chu a nih a rinawm.