French court-in Mbappe hnena uro 60m pe tur PSG hriattir!

Paris St-Germain leh an forward hlui Kylian Mbappe-te inkhinna boruak kha tarlan a ni tawh thin a; court hial an thlen hnuah French court pakhat chuan PSG hi an striker hlui hnena hlawh leh bonus an pek kim loh avangin euro maktaduai 60 (£52.5m) pe turin thupek a tichhuak!
Mbappe hian a club hlui chu a hlawh leh bonus dawn tur pe kim duh loa puhin nikum November thla daih tawh khan Paris labour court-ah complaint thehlutin, euro maktaduai 263 (£231.5m) pek a phut a; hetih rual hian European champion PSG lam pawhin an duh anga transfer a kalpui duh loh avanga zangnadawmna atan France captain hi euro maktaduai 240 (£211m) chawi turin court an thleng ve bawk.
Kum 26-a upa ni ve ta Real Madrid forward Mbappe hian court hnenah a hlawh an pek kim duh loh chu euro maktaduai 55 (£46.3m) a nih thu thlen chungin a duh anga contract an tihsak loh avang leh club-in an enkawl dan tha lo tak avangin sum tam tham tak a phut tel bawk a ni.
PSG lam hian court hnenah sawi tur an nei ve tho a, kum 2023 khan euro maktaduai 300 tehrenga Saudi Arabian side Al-Hilal hnena hralhchhuaka sum tam tak huilut tur an nih laiin player chuan an thu a awih lo a, an sum hloh zangnadawmna atan sum thahnem tak an phutlet ve bawk a, court chuan thiam lo zawkah a puang ta tho a ni.