Khuarel chhiatna vangin kuminah mi 2,388 thi

Kum 2025 chhungin India-in khaw awm dan uchuak avanga chhiatna a tuar nasa hle a, mi 2,388 thi awm tawhin thlai chinna hmun hectare nuai tel leh ran vulh nuai telh loh a ni.
Ruah sur nasain tlangrama sabereka khuangkaih leh lei minin tlangrama chhiatna a thlen rualin phaizawlah tui a lian nasa hle bawk a. Sorkarin a chhinchhiahnaah heng thil avanga thi leh sum leh paia thil chân pawh a tam hle.
Himachal Pradesh-a Mandi, Kullu, Kangra leh Shimla-a ruah bawhawk surin tui lian leh lei min a thlen nasa a. Thuneitute chuan Rs. vaibelchhe 4,300 hu thil hloh leh thi mi 380 dawn an awm niin an sawi a. Kawngpui, lei leh chenna in tam tak chhiain hmun tam tak tlawhpawh theih loh a ni.
Punjab-ah Sutlej leh Beas lui lian vangin kum tam tak hnua tui lian an tawrh nat ber tuarin khaw 1,000 chuang tuiin a chim a. Lo zau tak a chim a, NDRF, army leh BSF tirh luh an ni a, baihvaite tan awmna tur siamsak an ni.
Parliament rorel inkhawma zawhna chhannaah tui tam lutuk kaihhnawihah kum 2020-21 leh 2025-26 (November 23, 2025 thleng) khan mi 13,384 thi an awm a. Thi tam ber kum chu 2024-25 kha niin mi 2,979 an thi a, 2023-24 khan mi 2,849 an thi bawk a. Kuminah hian November 23 thleng khan mi 2,388 an thi tawh bawk.
Hetih hun chhung hian ran vulh nuai 4.31 thi an awm a, chenna in nuai 28.7 a chhia a, thlai chinna hmun hectare nuai 587.8-a zau tuiin a chim chhe bawk.
Kumin April atang khan Himachal Pradesh-ah chuan thlai chinna ram hectare nuai 324.27 hloh a ni tawh a, state zinga hloh nasa ber an ni a. Maharashtra-ah hectare nuai 75.42, Karnataka-ah hectare nuai 14.81, Sikkim-ah hectare nuai 8.11 leh Punjab-ah hectare nuai 1.93 hloh a ni.
State te deuh zingah Arunachal Pradesh, Meghalaya leh Nagaland chu tuiin thlai a tihchhiat tam zualna a ni bawk.
Kum 2024-25 khan state hrang hrangten khuarel chhiatna an tawh avanga chhawmdawlna an dil zat chu Rs vaibelchhe 17,169 a ni a. National Disaster Response Fund (NDRF) Rs vaibelchhe 812 pek chhuah niin dil zat atang chuan 5% awrh chauh pek chhuak a ni thung.
Tripura chu dil tam ber niin Rs vaibelchhe 6,337 an dil a, Rs vaibelchhe 175 chauh an dawng thung a. Tamil Nadu pawhin Rs vaibelchhe 3,075 an dil laiin Rs vaibelchhe 522 an dawng a. Himachal Pradesh pawhin Rs vaibelchhe 1,202 dilin 10% pawh tling lo, Rs vaibelchhe 107 an dawng a. Khuarel chhiatna tuar zingah Bihar leh Andhra Pradesh chuan eng mah dawn an nei lo.
Heti taka khuarel chhiatna thleng nasa hi sik leh sa inthlak nasa vanga puh a nih rualin a invenna tur ngaihtuah that tawk loh vangah mi thiamte chuan an ngai a. Chhiatna thleng thei laka lo invenna, sik leh sa uchuak a awm pawha chhiatna thleng dawl thei tur infrastructure tha siam loh leh a hun taka nunna leh khawsak chhanna tura sum leh pai theh chhuah awm lo thin chu nunnain a tawrh zual chhan niin an ngai.