“Read Fest”

Tun hnai khan Mizoram Youth Commission chuan Aijal Club Park-ah Read Fest 2025 a buatsaih a. He Read fest hi lehkhabu chhiar lam tuimite leh Mizo thalaiten lehkha chhiar lama hma an sawn theihna atana buatsaih a ni awm e. Lehkhabu kaihhnawih intihhlimna chi hrang hrang huaihawt a nih bakah lehkhabu chi hrang hrang lei theiha phochhuah a ni a, MYC Book Club member-te tan special discount-in lehkhabu a lei theih bawk.
|halaiten lehkhabu an ngainat theihna tura hetiang punkhawmna/kut (Festival) huaihawt a ni hi a remhriat thlak hle a, uar zawka huaihawt chhoh zel theih ni se a duhawm hle a ni. Chutih rualin, ‘tawng ral mai hlauhthawnawma awm mek’ kan ni kan intih mek laiin, sap tawng hman loh theih lohna chu awm bawk mah se, mahni tawnga dah ve theih rengah sap tawng kan chelek ta lutuk pawh hi kan vei tlan a pawimawh hle mai. Read fest tih aiah “Lehkhabu Chhiar Kût” te pawh a tih theih awm e.
Information technology lama hmasawnna nasa tak hian a enga kimah mai hian ‘awlsamna’ hi min chhawp chhuahsak vek tawh a, chu chuan lehkhabu chhiar hlutna leh thatna a hliahkhuh nasa ta hle a. Tunhma chuan lehkhabu kan chhiar thin a, tunah chuan kan ‘ngaithla’ ta. Mit that loh avanga lehkhabu chhiar thei lo tan pawh ngaihthlak tur a awm ta hi a hlu viau si a ni.
Puitling tan chuan lehkhabu chhiar hi a lo harsa ta viau a nih pawhin, a pawimawh ta bera chu, naupang thanglian chho mekte hi an ni. Lehkhabu ‘chhiar tuimi’ hrim hrim hi naupang zingah pawh a awm theih a, lehkhabu chhiar tuimi ni lem lote pawh an tet laia lehkhabu chhiar ngainattir hi thil pawimawh tak a ni. Zirlaibu (text book) piah lamah, naupang chhiar tur tawk, thawnthu (folk tales) emaw, hnam chanchin (Mizo history) emaw, kum khat chhunga chhiar tur zat bituksak te pawh a tangkaiin a rinawm.
MYC Book Club te a awm ta a, thil lawmawm tak a ni. Hei hi school hrang hrangah campaign neih a tha viauin a rinawm. Club member tan lehkhabu chhiar lama inelna hrang hrangte pawh huaihawt chhoh zel ni ta se, entir nan: Mizo history hriatzauna lama inelna ang chi te pawh.