Ruihhlo ngai ho khawm huk Central YMA-in bawhzui zel

Ruihhlo ngai ho khawm huk
Central YMA-in bawhzui zel
2025 December 24 khan Central YMA, Police leh Excise & Narcotics chuan Aizawl khawpui chhunga ruihhlo ngai ho an khawm huk a, a tam zawk hi Tawngtai Bethel Camping Centre-a dahluh nghal niin, tun thlengin Central YMA-in a tul angin a la bawhzui zel.
December 24 zing dar 5.00 atangin Central YMA leh Aizawl khawpui chhung YMA branch thenkhat hruaitute, Police leh Excise & Narcotics chuan Aizawl-ah ruihhlo do hnatlang an nei a. Ruihhlo kaihhnawihah mi 100 chuang an khawm.
Hnatlanga thawk chhuakte hi hmun hrang hrangah insem darhin ruihhlo ngai, riahna mumal nei lo leh Aizawl khawlai hmun remchanga riak thin mi 100 chuang an khawm a, heng zinga 68 (mipa 42 leh hmeichhia 26) chu Tawngtai Bethel Camping Centre (TBCC) Sakawrtuichhunah dah an ni.
Hnatlanga thawk chhuak hi Central YMA president R Lalngheta leh SP Aizawl Zosangliana ten an ho a. Home minister K Sapdanga leh adviser to CM Lalmuanpuia Punte, MLA ten an tawiawm bawk. Home minister hian Home-a dah luhna tur senso atan cheng nuai khat a hlan nghal a. Central YMA hian ei tur a buatsaih sak a, chumi hnuah TBCC-a dah luh an ni.
Central YMA hian TBCC-a dahluh ho hi a tul angin an vil zui a, an chhungte biakpawh ngai bepawpin, la biakpawh mai theih loh leh chhungte nei mumal lo pawh theih ang angin an chhawmdawl a; taksa chak lo zual leh damdawi ina dah ngai damlo enkawl zui hna thawkin, Civil Hospital Aizawl-a dahluh ngai chu YMA Dawrpui Branch-in an lo tuamhlawm zel bawk a ni.