Krismas Bazar-ah inhralh \ha lo

Hunpui a liam a, hunpuiin a ken tel chu bazar, Krismas Bazar tia sawi hi a ni awm e. Hunpui liam taa Krismas Bazar khan kum hmasa lam a pha lo tih chu dawrkaite sawi dan a ni.
Aizawl Krismas Bazar-a dawrkaite chuan kum hmasa aia an inhralh that loh thu an sawi a, mihring pawh kum hmasate aiin an tlem nia a lan thu an sawi.
“November te aiin December-ah chuan bazar vela kal chu an pung ngei a, traffic pawh a tawt sawt a. Mahse kum hmasate nena khaikhin chuan mihring pawh an thahnem lo a, kawngpui pawh a tawt lo zawk,” dawrkai pakhat chuan a ti.
Millennium Centre Dawrkai Association hruaitu pakhat chuan Millennium Centre-a dawrkaite kum hmasa aiin an inhralh tha lo tlangpui nia a lan thu a sawi a, mihring pawh kum hmasa aiin an thawl a, an sawi khawm pawhin dawr hrang hrangin chhun thingpui in hman lo khawpa buai an nei lo tlangpui tih a sawi.
Millennium Centre chung zawla inphote pawhin kum dang aia inhralh a har thu an sawi a, ‘Kan beidawng a, mahse kan ti laklawh si a,’ ti te pawh an awm. A chung zawla inphote zingah hian dawr hman man hmu ta lote pawh an awm.
Zion Street lama dawrkaite pawhin inhralh a har thu an sawi a, kum dang angin Zion Street-ah mi an tawt mup mup lo tih te, No Vehicle Zone-ah pawh kum hmasa angin mi an tawt mup mup lo tih an sawi. Zion Street-a dawr pakhat chuan No Vehicle Zone-ah mi an tawt ang tiin godown-a an bungruate pawh dawrah an chhawp sa a, mahse chutiangin mi an tawt ta lo tih an sawi.
Mizoram Merchants Association (MIMA) hruaitute chuan kum hmasa aia inhralh tha pawh an awm tho ang a, mahse a tlangpuia lak chuan kum hmasa an pha lo tlangpui nia a lan thu an sawi.
MIMA hruaitu pakhat chuan sum lengvak a tlem a, chu chu Krismas Bazar-ah pawh a lang tih a sawi a, sum lengvak a tam leh tam loh hi bazarah a lan thin thu sawiin, “Online-a thil leite vangin inhralh a har tih ngaihdan hi a dikna lai a awm ang a, mahse online-a thil lei an tam a nih pawhin Krismas dawnah hi chuan mi an chhuak nasa a, inhralh pawh a awl sawt thin tho a, tun tum kha chu chutiang a ni ta lo a,” a ti.
“Thingtlang mite sum neih leh neih loh hi Krismas Bazar-a inhralh tinuamtu leh tiharsatu pawimawh a ni,” a ti a, “Aizawl Krismas Bazar-ah hian thingtlang mi an tam thin a, thingtlangah sum a tam chuan an tam a, a tam loh chuan an tlem a. Thingtlangah sum a tam loh chuan Aizawl Krismas Bazar-ah a lang. Chu chu kumina kum dang kan phak loh chhan pakhat a ni ang,” a ti bawk.