Mizo naupangin India ram chawimawina sang dawng

Mizo naupangin India ram
chawimawina sang dawng
Mizo naupang Esther Lalduhawmi Hnamte (9) chuan India rama naupang chawimawina sang ber – Pradhan Mantri Rashtriya Bal Puraskar chu President Droupadi Murmu hnen atangin 2025 December 26 khan a dawng.
Chawimawina hi New Delhi-a Vigyan Bhavan-ah sem a ni a, state 18-a naupang 20-in an dawng. Chawimawina sem zawh hnu hian New Delhi-a Bharat Mandapam-ah ram pum huap naupangte pual inkhawm Veer Bal Diwas 2025 hman a ni a. Hetah hian Prime minister Narendra Modi chuan thu a sawi bakah Union minister for Women and Child Development Annpurna Devi pawhin thu a sawi a ni.
Pradhan Mantri Rashtriya Bal Puraskar hi kuym 18 hnuailam naupang huaisen, infiamna lama chungnung bik, computer leh AI lama thiamna nei bik leh performing arts lama thiamna nei bik hnenah kumtina hlan thin a ni a. Lunglei College Veng naupang zaithiam, ‘Vande Mataram’ a sak atanga India mipui hriat hlawh Esther Lalduhawmi Hnamte hi hriat theih chinah Mizo naupang he chawimawina dawng hmasa ber a ni.
2025 December 30 khan Lunglei district bawrhsap Navneet Mann chuan Esther Lalduhawmi Hnamte chawimawina dawn hi lawmpuiin chawimawina thuziak bakah sumfai Rs. 10000 a hlan. Bawrhsap chuan Esther Hnamte chu Lunglei leh Mizoram tihmingthatu a nih bakah zai hmanga ram leh hnam inpumkhatna atana thawktu a ni, tiin, chhuanawm a tih thu a sawi a. Rashtriya Bal Puraskar chawimawina dawn chu phu a tih thu a sawi a ni.
December 31 khan Lunglei West bialtu MLA T Lalhlimpuia MLA chuan Esther Hnamte hi an veng, College Veng khawtlang huapin lawmpuina a buatsaihsak bawk a ni.