Kum thar chibai bukna

The Aizawl Post chhiartute zawng zawng 2026 kum thar Chibai u le.
Mihringte hun bi chhiar dana ‘kum thar’ kan chuankai rual hian, mihring rilru pawh hi a thar ve nghal thin a; hei hian kawng hrang hranga hmasawnna a hring chhuak thin. ‘He kum thar hian, hmasawnna thar, hlimna thar leh malsawmna thar thlen theuh che u rawh se’ tih hi The Aizawl Post chhiartute zawng zawng kan duhsakna a ni.
Chanchinbu tih chhuah loh karah thil tam tak, a chhe lam leh a tha lam a thleng a, thlirletna (review) hun awm chho zel turah ngai ila. Tun tuma tarlan zauh chakawm tak pakhat chu, tunhmaa la thleng ngai lo, Mizorama Krismas hmang tura lokal khualzinmi (tourist) an pung ta hluai kha a ni awm e. Hei hi inkalpawhna awlsam leh rang zawk ‘railway service’-in Mizoram khawpui a rawn thlen tak vang a ni pakhatin a rinawm. Pakhat lehah chuan, social media a chak tawh a, Mizoram tlawha lo zin khualzinmiten Mizoram mawina leh nawmna social media lamah an theh darh nasa a, hei hian awmzia thui tak a nei bawk. Tunhmaa khualzin tlawhpawh vak loh kha, thawklehkhatah an rawn pung ta hluai a, thlenna tur (hotel/lodging/homestay etc) kan lo nei tam tawk si lova, khualzin tam tak chu an buai phah hle nia thu dawn a ni. Khual thlenna tur lamah nasa taka tan kan lak a ngai tih a lang.
Kum thar lawmna atana halmawi etc. chungchangah, ‘khap’ aiin, system felfai tak ruahman a tul tawh nia ngaihdan nei an tam sawt hle tih a lang bawk.