Trump-a’n Venezuela hruaitu thar vau zui nghal

Trump-a’n Venezuela hruaitu thar vau zui nghal
Donald Trump-a chuan Venezuela-a hruaitu thar, Delcy Rodríguez-i chu vau nghalin ‘thil dik a ti lo a nih chuan hremna na tak, Maduro-a hmuh ai pawha lian ni thei’ a tuar dawn tih a sawi.
US chanchinbu, The Atlantic-ah vauna hi tar lan a ni a, hetih lai hian president a man tak, Nicolás Maduro-a chu New York court-ah Thawhtanni (India-a zan lam)-ah a inlan ang.
US hian Maduro-a hi ruihhlo tawlh leh ralthuam chelekah dan bawhchhiaah a puh a, ‘ruihhlo firfiak’ tiin a sawi a, amah chuan a pha thung.
Rodríguez-i hi Maduro-a vice president a ni a, Pathiannia cabinet meeting a neih hmasak berah chuan US thawhpui lam a sawi a ni.
“US sorkar hi khawvel dan anga kan ngaihtuah mekte inhrilh tawna thawhhopuiah kan sawm a ni,” a ti.
Venezuela-a Supreme Court leh sipaiten an thlawp angin president atan Caracas-ah Thawhtanni zing dar 08:00 (India-a tlai dar 05:30) khan lak luh a ni.
US Secretary of State Marco Rubio-a chuan Inrinnia Caracas an kapa Maduro leh a nupuite mana US-a an hruai hnuah hnuah US chuan Venezuela a do lo tih a sawi.
Hetih lai hian Democratic senator thenkhat chuan an sorkar chet dan chu ‘indona’ tiin an sawi thung.
Pathiannia The Atlantic-a an kawmnaa tihchhuahah Trump-a hian Rodríguez-i chungchang hi a sawi a, thuneitu an inthlak a, a duh a ti thei a, a aia chhia erawh thlen lo turin a ti a ni.
Inrinni khan Trump-a hian US-in Venezuela hi a hima dan ang taka thil tih theih a nih hma chu an ‘enkawl’ tur thu a lo sawi tawh a. US oil company-te pawh inbun tur leh ‘an ram tana sum siam turin’ an lut dawn tih a sawi bawk.
US president-in hetiang a sawi hnuah pawh Maduro-a thawhpuite chu Venezuela enkawltu erawh an la nih chhunzawm.
Cuban sorkar chuan US-in Maduro leh a nupui man tuma beihpui an thlaknaah hian ‘Cuban huaisen tak 32’ an thi niin a sawi ve mawk a. Cuba hi Maduro-a thian tha niin ni hnih sun an nih tur thu a puang.
Pathiannia TV-a an kawmna hrang hrangah Rubio-a chuan US sipaiten Venezuela-a beihpui an thlak chu dik lo a nih loh thu leh South American ram nen hian an indo ta a nih loh thu a sawi nasa.
“Ruihhlo tawlhtu pawlte nen kan indo va, Venezuela nen a ni lo,” tiin Rubio hian NBC-in Meet the Press an huaihawtah pawh a sawi.
Secretary of state hian CBS hnenah pawh Venezuela hian ‘thutlukna dik lo’ a siam a nih chuan US chuan ‘kan tana tha tur leh kan thatna vawn nan tih dan kandap zel ang’ tih a sawi.
Trump-a chuan Venezuela thenawm, Colombia pawh a vau a. Air Force One-a a chuanna atangin Colombia laka tharum hman a nih loh tur thu a sawi duh lo va, Colombian President Gustavo Petro pawh ‘sick man’ tiin a sawi.
United Socialist Party of Venezuela hotu, Maduro-a hi kum 2013 atanga an ram hruaitu niin eptute na taka hmet mit thin nia sawi a ni a, tharum pawh a hmang thin nia sawi a ni.
A duh lohtute leh ram dang sorkar tam tak chuan kum 2024 inthlana a chak dan pawh dan lo niin an sawi.
Venezuela-a left-wing hruaitu leh a nupui, Cilia Flores te hi Inrinni khaw var hma khan US hian beihpui thlakin an man a, an sipai hmunte an kap bawk.
An nupa hian ralthuam leh ruihhlo tawlhnaa inhnamhnawiha puh an ni a. Maduro-a chuan ruihhlo tawlha puhna phain US hian ‘ruihhlo do’ tia chhuan lamin amah paih thlaa Venezuela-a tuialhthei neih a tumna hmanrua zawk niin a sawi.