Maduro-a man hnuah rangkachak man to nghal

US-in Venezuelan President Nicolás Maduro a man hnuah khawvel politic inlumlet nasa zual hlauhthawnna avangin metal hlu chi man a sang chak nghal hle.
Thawhtanni khan Asia-ah chuan rangkachak man 1.8%-a sangin ounce khat $4,408 (£3,282) a ni a, tangkarua phei chu 3.5%-in a sang dawrh bawk.
Hetih lai hian tuialhthei thlitfim loh man erawh a che nasa lutuk lo va, a san hretna hmunte pawh a hmaa a man a sanna sa hmunah a ni deuh zel.
Rangkachak leh tangkarua man hian kum 2025-a a man a to lai ber ang zat a thleng mek a, tun hnaiah a man tlahniam leh hret mah se a sang lehnghal tihna a ni.
Nikum kum tawpah khan rangkachak hi a man tlahniam mah se kum liam ta kha kum 1979 hnua a chet that ber a ni a, a man hi 60% chuang daihin a sang a, a to lai berin ounce khat $4,549.71 man a ni.
Tun tuma a man a san chhan hi thil hrang hrang vang a ni thei a, a punna zat bi tihhniam rinna avang te, central bank liante a hlawma an lei vang leh khawvel puma politic inlumlet leh eibar dapna kawng nghawng thei thil a nih vang a ni ber.
Tuialhthei man su deuh mah se a danglam tam lo va, Washington-in Venezuela-a kut a thlak chuan thlitfim loh pek kawngah erawh nghawng a nei ngei tura ngaih a ni.
US President Donald Trump-a chuan Maaduro-a a man hnuah Venezuela-a tuialhthei khurah inbun a tum hle a, himna leh dan anga thil kalpui theih a nih hma chu enkawl a tum.